ಕಾವ್ಯ ಸಂಗಾತಿ
ಇಂದಿರಾ ಮೋಟೆಬೆನ್ನೂರ
ಕನಸುಗಾರ
ಎದೆಯ ಪ್ರತಿ ಮಿಡಿತ
ಮಿಡಿದಿದೆ ನಿನ್ನ ಹೆಸರು…
ಉಸಿರ ಪ್ರತಿ ಏರಿಳಿತ
ಉಲಿದಿದೆ ನಿನ್ನ ನೆನಪು….
ನಾಮಾವಳಿಯ ಜಪದಿ
ನಿನ್ನ ಭಾವ ಬುತ್ತಿ ಒಲುಮೆ…
ನರನಾಡಿಗಳ ತುಡಿತ ಬಡಿತದಿ
ನಿನ್ನ ಜೀವ ಮುಗುಳ ಕುಲುಮೆ…
ಪ್ರೀತಿ ಕೋಟೆ ಸಾಮ್ರಾಜ್ಯ
ಮೌನ ಸಾಮ್ರಾಟನ ಕವನ ಬಲುಮೆ…..
ಕನಸ ಕನವರಿಕೆಗಳಲ್ಲಿ ನಿತ್ಯ
ನಿನ್ನ ಕಾವ್ಯ ಶಬ್ಧ ಚಿಲುಮೆ….
ಮನ ಸೂರೆಗೈದ ಒಲುಮೆ
ಮಾತ ಮೋಡಿಗಾರ….
ಪ್ರೀತಿ ಕೋಟೆಯ ಒಡೆಯ
ಹೃದಯ ಕದ್ದ ಕವಿ ಕನಸುಗಾರ….
ಭಾವದೊಡಲ ಯಾನದಲಿ
ಮೌನ ರಾಗ ಪಯಣಿಗ….
ಸ್ನೇಹ ಪಲ್ಲವ ಗಾನದಲಿ
ಕವಿ ಸುಮ ಹೃದಯಿ ಗಾರುಡಿಗ..
ಹೃದಯ ಮೌನ ಮಡಿಲ
ಮೃದು ಮಧುರ ಮಾತುಗಾರ…
ಸ್ನೇಹ ಕಥೆಯ ಭಾವ ಬರೆದ
ಕಾವ್ಯ ಲೋಕದ ಪಯಣಿಗ..
ಇಂದಿರಾ ಮೋಟೆಬೆನ್ನೂರ
