ಕಾವ್ಯ ಸಂಗಾತಿ
ಕವನದ ಕನಸು
ಲಲಿತಾ ಪ್ರಭು ಅಂಗಡಿ
ನನ ಕವನಕೆ ಒಂದು ಕನಸು
ಅದಕೇನೊ ಹೊಸತನದ ಸೊಗಸು
ಕನಸೆಂಬ ಕವಿತೆ ಗರ್ಭಧರಿಸಿ
ಶಬ್ದಗಳಿಗೆ ಜನುಮ ನೀಡಿ
ಪದಗಳ ಓಂಕಾರಕೆ ಸ್ವರಕೂಡಿ
ವಾಕ್ಯಗಳ ತೋರಣಕೆ ಬಳ್ಳಿಯಾಗಿ
ಭಾವನೆಯ ಬೆಸುಗೆಗೆ ತೊಟ್ಟಿಲಾಗಿ
ಕಾವ್ಯದೊಲುಮೆಗೆ ಆಸರೆಯಾಗಿ
ಆತ್ಮೀಯ ಅನುಬಂಧಕೆ
ಅಂಬೆಗಾಲಿಡುವ ಆತುರ
ಮುದ್ದು ಮಾಡಿ ಹಾರೈಸಿ
ನಡೆದಾಡುವ ಭರವಸೆ
ಪ್ರೀತಿಯ ತೊಡಿಗೆ ಉಡಿಸಿ
ಶ್ರೃಂಗಾರದಿ ಮೆರೆವ ಬಯಕೆ
ಮನಕೆ ತಂಪನಿಟ್ಟು ತಣಿಸಿ
ಮಮತೆಯಿಂದ ಎಲ್ಲರೊಳ್ ಬೆರೆವ ಆಸೆ
ಲಲಿತಾ ಪ್ರಭು ಅಂಗಡಿ
