ಕಾವ್ಯ ಸಂಗಾತಿ
ನಲಿವ ಮನಸ್ಸು
ಸುಧಾ ಪಾಟೀಲ
ಮನದ ತುಂಬಾ
ನಗೆ ಮಲ್ಲಿಗೆಯ
ಹೊತ್ತು ಹೃದಯದ
ತುಂಬಾ ನವಿರುಗಾಳಿಯ
ಬೀಸಿ ನಲಿವ ಮನಸ್ಸು
ರಂಗೇರಿದೆ
ಸಂಕೋಚದಿ ಹಿಡಿದಿಟ್ಟ
ಭಾವನೆಗಳ ಧುಮುಕಲು
ಬಿಟ್ಟು ಜಲಪಾತದಂತೆ
ಹೆಪ್ಪಿಟ್ಟ ಕನಸುಗಳ
ಅರಳಲು ಬಿಟ್ಟು
ನಲಿವ ಮನಸ್ಸು
ಉಕ್ಕೇರಿದೆ
ಅನವರತ ನಿನ್ನದೇ
ಧ್ಯಾನದಲಿ ತಂಗಿ
ವಾಸ್ತವದ ಹಂಗಿಲ್ಲದೆ
ಆಗುಹೋಗುಗಳ
ಪರಿವೆಯಿಲ್ಲದೆ
ನಲಿವ ಮನಸ್ಸು
ಚಿಮ್ಮತಲಿದೆ
ಹೊಸ ಹೊಸ ಭಾವನೆಗಳ
ಹೊತ್ತು ತಂದೆ ಆಗಾಗ
ಅದ ಕಂಡು
ಆಗಸದಿ ಹಾರಾಡುವ
ಹಕ್ಕಿಯಾಗಿ ರೆಕ್ಕೆ ಬಿಚ್ಚಿ
ನಲಿವ ಮನಸ್ಸು
ಗಗನಕ್ಕೇರಿದೆ
ಎಲ್ಲದರಲ್ಲೂ ನಿನ್ನನ್ನೇ
ಕಾಣುತ ಘಳಿಗೆಗೊಮ್ಮೆ
ಮಗ್ಗಲು ಬದಲಿಸುತ
ತವಕದ ಪರಮಾವಧಿಯ
ಮೀರಿ ನಲಿವ ಮನಸ್ಸು
ಮಿಂಚುಬಳ್ಳಿಯಾಗಿದೆ
ಗೆಳೆತನದ ಪರಿಧಿಯಲಿ
ವಿಶ್ವಾಸವಿಟ್ಟು ನೀ
ಕರೆದಾಗ ಕುಣಿವ
ಹೃದಯವನು ತಣಿಸಿ
ನಲಿವ ಮನಸ್ಸು
ಉತ್ತುಂಗಕ್ಕೇರಿದೆ
ಸುಧಾ ಪಾಟೀಲ
ಅತ್ಯಂತ ಭಾವಪೂರ್ಣ ಕವಿತೆ ಮೇಡಂ ಧನ್ಯವಾದಗಳು
ಕವಿತೆ ತುಂಬಾ ಚೆನ್ನಾಗಿದೆ.
ನನ್ನ ಕವನ ಮೆಚ್ಚಿದ ಕವಿ ಮನಸುಗಳಿಗೆ ಧನ್ಯವಾದಗಳು