ಕಾವ್ಯ ಸಂಗಾತಿ
ಅನುರಾಧಾ ಶಿವಪ್ರಕಾಶ್
ಸೊಬಗಿ‌ನ ಸಿಂಗಾರಿ
ಅರಳು ಮಲ್ಲಿಗೆ ನಗುವ ಸೊಬಗಿಗೆ
ಸೋತು ಹೋಗುವುದೀ ಮನ
ಎದೆಯ ಒಳಗಡೆ ಮಧುರ ಭಾವವು
ಅರಳಿ ಚಿಮ್ಮುವುದೀ ಕ್ಷಣ /೧/
ಕಳೆದ ಬಾಲ್ಯದ ನೆನಪು ಕಾಡಲು
ಮೊದಲ ಕಾರಣ ಈ ಘಮ
ಹೂವ ರಾಶಿಲಿ ಆಯ್ದು ಹೆಕ್ಕಲು
ಮೊದಲ ಆದ್ಯತೆ ಈ ಸುಮ /೨/
ಬರಿದೆ ದಾರದಿ ಭಾವ ಪೋಣಿಸೆ
ಮಾಲೆಯಾಗುವುದೀ ಬಗೆ
ಮುಡಿಯನೇರುವ ಸಮಯ ಕಾದಿರೆ
ಮೊಗದಿ ಅರಳಿದೆ ನಸುನಗೆ /೩/
ಮಂದ ಗಾಳಿಯು ಮೆಲ್ಲ ಬೀಸಲು
ಗಂಧವೆಲ್ಲೆಡೆ ಹಬ್ಬಿದೆ
ಸಂಜೆ ತಂಪಲಿ ಕಂಪಿನೋಕುಳಿ
ನಾರಿ ಮನಸು ನಲಿದಿದೆ/೪/
ಬಾಡಿ ಹೋಗುವ ಕ್ಷಣಿಕ ಬಾಳಲಿ
ಸುತ್ತ ಸಂತಸ ಚೆಲ್ಲಿದೆ
ನೋಡಿ ತಣಿವ ನಯನದ್ವಯದಿ
ತೃಪ್ತ ಭಾವವು ತುಂಬಿದೆ /೫/
ಅನುರಾಧಾ ಶಿವಪ್ರಕಾಶ್
