ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ
ಮೊಗವ ತೋರಾ
ಬಾರಾ ಬಾರಾ ಮೊಗವ ತೋರಾ
ಒಲವಿನ ಚೆಲುವನೇ ಬೇಗ ಬಾರಾ//
ಅಗಲಿಕೆಯ ನೋವ ಸಹಿಸಲಾರೆ
ಅರೆಗಳಿಗೆ ನಿನ್ನ ಬಿಟ್ಟಿರಲಾರೆ
ಅಂತರಾತ್ಮದ ಬಯಕೆ ಹತ್ತಿಕ್ಕಲಾರೆ
ಅಂಬುದಿಯ ಬೇಗುಧಿಯ ಭೇದಿಸಲಾರೆ//
ಕಣ್ಣಂಚಿನ ಆಸೆ ಹಂಬಲಿಸಿದೆ
ತುಟಿಯಂಚಿನ ಬಯಕೆ ಕರೆದಿದೆ
ಒಡಲ ತುಡಿತ ಹಲುಬುತಿದೆ
ಕಡಲಾಳದ ಕೊರೆತಕೆ ಮನದ ದಡ ಮರುಗುತಿದೆ//
ಬಂದ ಸಂಬಂಧ ನೆನೆನೆನೆದು
ಪ್ರೀತಿ ಮಧುವನು ಅರಸಿ ಅರಸಿ
ಪ್ರೇಮರಾಗವನೇ ಹಾಡಿ ಹಾಡಿ
ಕಂಪಿಸಿದೆ ಜೀವ ನಿನ್ನ ಬೇಡಿ ಬೇಡಿ ಹುಡುಕಾಡಿ//
ಸಲುಗೇ ಸರಸ ಸಲ್ಲಾಪದ ಸವಿಯು
ಒಡನಾಟ ನಿನ್ನಾಟದ ರುಚಿಯು
ಸವಿದಷ್ಟು ಸವಿಯಬೇಕೆಂಬ ಬಯಕೆಯು
ಕಾಡುತಿದೆ ನಿನ್ನ ಸನಿಹ ಬೇಡಿ ಜೀವ ಭಾವವು//
ಒಂಟಿತನ ಬೇಸರ ತಂದಿದೆ
ಜೊತೆ ಬೇಡಿ ತಲ್ಲಣಗೊಂಡಿದೆ
ಉಸಿರು ಕಸಿಬಿಸಿಗೊಂಡು ಬಳಲುತಿದೆ
ಬಯಕೆ ಬಾಂದಳ ಬಿಡದೆ ಮರೆಯದೆ ಅಳುತಿದೆ//
