ಅಂಬೇಡ್ಕರ್ ಜಯಂತಿ ವಿಶೇಷ
ಹನಿಬಿಂದು
ನಾನು ಅಂಬೇಡ್ಕರ್ ಅಲ್ಲ
ನಾನು ಅಂಬೇಡ್ಕರ್ ಅಲ್ಲವೇ ಅಲ್ಲ
ಕಾರಣ ನಾನು ಭಾರತೀಯ ಅಲ್ಲವೆಂದು ಅಲ್ಲ
ನಾನು ಸಂವಿಧಾನದ ಕರಡು ಸಮಿತಿಯ ಅಧ್ಯಕ್ಷನಾಗಿಲ್ಲ ಎಂದಲ್ಲ
ನಾ ಹಲವಾರು ಪದವಿಗಳ ಪಡೆದಿಲ್ಲ ಎಂದಲ್ಲ
ನಾ ಡಾಕ್ಟರೇಟ್ ಗಳಿಸಿಲ್ಲ ಎಂದಲ್ಲ
ನಾ ಪ್ರಧಾನಿ ನೆಹರು ಅವರಿಂದ ಆಧುನಿಕ ಮನು ಎಂದು ಕರೆಸಿಕೊಂಡಿಲ್ಲ ಅಂತಲ್ಲ
ನಾ ಸ್ವತಂತ್ರ ಭಾರತದ ಮೊದಲ ಕಾನೂನು ಸಚಿವರಾಗಿಲ್ಲ ಎಂದಲ್ಲ
ನಾ ಜ್ಯೋತಿ ಬಾ ಫುಲೆ ಅವರಿಂದ ಪ್ರಭಾವಿತನಾಗಿಲ್ಲ ಎಂದಲ್ಲ
ನಾ ಗಾಂಧೀಜಿಯವರ ಅನುಯಾಯಿ ಅಲ್ಲ ಎಂದಲ್ಲ
ನಾ ಭಾರತದ ಕೆಳ ಜಾತಿಯ ಜನರಿಗೆ ಸಿಗಬೇಕಾದ ನ್ಯಾಯಕ್ಕೆ ಹೋರಾಟ ಮಾಡಿಲ್ಲ ಎಂದಲ್ಲ
ನಾ ಅಮೆರಿಕಾದಲ್ಲಿ ಹೋಗಿ ಓದಿ ಬಂದಿಲ್ಲ ಎಂದಲ್ಲ
ನಾ ಸಾವಿರಗಟ್ಟಲೆ ಪುಸ್ತಕ ಓದಿಲ್ಲ ಎಂದಲ್ಲ
ನಾ ಅಮೆರಿಕಾದ ಸಂವಿಧಾನ ಓದಿ ಅದರಿಂದ ಪ್ರಭಾವಿತ ಆಗಿಲ್ಲ ಎಂದಲ್ಲ
ನಾ ಸಾವಿರಗಟ್ಟಲೆ ಹಳೆ ಪುಸ್ತಕ ಖರೀದಿಸಿ ಭಾರತಕ್ಕೆ ತಂದಿಲ್ಲ ಎಂದಲ್ಲ
ನಾ ಕೆಳ ಜಾತಿಯಲ್ಲಿ ಹುಟ್ಟಿ ಜೀವನದಲ್ಲಿ ನೋವು ಅನುಭವಿಸಿಲ್ಲ ಎಂದಲ್ಲ
ನಾ ಬುದ್ಧಿಶಕ್ತಿಯಲ್ಲಿ ಉನ್ನತ ಸ್ಥಾನದಲ್ಲಿ ಇಲ್ಲ ಎಂದಲ್ಲ
ನಾ ಭಾರತೀಯರ ಉತ್ತಮ ಪ್ರತಿನಿಧಿ ಆಗಿಲ್ಲ ಎಂದಲ್ಲ
ನಾ ಭಾರತೀಯ ಸ್ವಾತಂತ್ರ್ಯ ಹೋರಾಟಗಾರ ಆಗಿಲ್ಲ ಎಂದಲ್ಲ
ನಾ ಸರ್ವ ಧರೆಯಲಿ ಸರ್ವ ಮನಗಳ ಒಳಗೆ ಅವಿತು ಕುಳಿತಿಲ್ಲ ಎಂದಲ್ಲ
ಆದರೂ ನಾ ಅಂಬೇಡ್ಕರ್ ಅಲ್ಲ
ನಾ ಭೀಮನಲ್ಲ ..
ನಾ ಅಂಬೇಡ್ಕರ್ ಅವರ ಸಾಧನೆಗಳ ಮೆಚ್ಚುವ ಅಭಿಮಾನಿ.
ಅಂಬೇಡ್ಕರ್ ಭಾರತೀಯ ಎಂದು ಹೆಮ್ಮೆಯಿಂದ ಬೀಗುವ ಸ್ವಾಭಿಮಾನಿ ಅಷ್ಟೇ!
