ಮಕ್ಕಳ ಕವಿತೆಗಳು
ಅರುಣಾ ರಾವ್
ಅಭ್ಯಂಜನ
ವಾರದ ರಜೆಯ ದಿನದಂದು
ಮಾಡಲೇ ಬೇಕು ಅಭ್ಯಂಜನ ||
ಹಿಂದಿನ ದಿನವೇ ಹಂಡೆಯ ತುಂಬ
ನೀರನು ತುಂಬಿಸಿ ಇಡಬೇಕು|
ಮರುದಿನ ಬೆಳಗಿನ ಜಾವಕೆ ಎದ್ದು
ಹಂಡೆಗೆ ಉರಿಯನ್ನು ಹಾಕಬೇಕು|
ಅಮ್ಮನು ಹಾಕಿದ ಹಸೆಮಣೆ ಮೇಲೆ
ಎಲ್ಲರೂ ಸಾಲಾಗಿ ಕೂರಬೇಕು|
ತಲೆಗೆ ಕೆನ್ನೆಗೆ ಕೈಕಾಲುಗಳಿಗೆ
ಎಣ್ಣೆಯ ತಿಕ್ಕಿಸಿಕೊಳ್ಳಬೇಕು|
ಕೆನ್ನೀರಿನ ಆರತಿ ಎತ್ತುವ ಸಮಯದಿ
ತಟ್ಟೆಗೆ ಕಾಣಿಕೆ ಹಾಕಬೇಕು|
ಮೂರ್ನಾಲ್ಕು ಗಂಟೆ ನೆನೆದ ನಂತರ
ಅಭ್ಯಂಜನ ಸ್ನಾನಕೆ ನಡೀಬೇಕು|
ಬಿಸಿ ಬಿಸಿ ಹಬೆಯಾಡುವ ನೀರನು
ಹುಯ್ದುಕೊಳ್ಳುತ ಮೀಯಬೇಕು|
ಬಿಸಿ ಬಿಸಿ ಅಡುಗೆ ತಿಂದು ನಿದ್ರಿಸಿ
ಸವಿಗನಸಗಳನು ಕಾಣಬೇಕು|
ಅಭ್ಯಂಜನ ಮಜವನು ಜೀವನದಲ್ಲಿ
ಒಮ್ಮೆಯಾದರೂ ಪಡೀಬೇಕು|
ಕಂಡೀಷನರ್ರು ಶಾಂಪು ಹಾಕದೆಯೇ
ಕೂದಲು ಫಳಫಳ ಹೊಳೀಬೇಕು|
