ರೆಕ್ಕೆ ಬಿಚ್ಚಲು
ಪ್ಯಾರಿಸುತ
ಎಲ್ಲಿ ನೀನಿಲ್ಲವೋ…
ಎಲ್ಲಿ ನೀನಿಲ್ಲವೋ ಅಲ್ಲಿ ನಾನೂ ಇಲ್ಲ
ಅದು ನಿಲಯವಾಗಿದ್ದರು, ಆಲಯದಂತಿದ್ದರೂ,
ಇದ್ದರೂ ಅದು ಶರೀರವಷ್ಟೇ..!
ಮನಸು ನಿನ್ನ ಬೆನ್ನು ಬಿದ್ದಿದೆ
ಆ ಕರಿನೆರಳಿನಂತೆ,
ಮಾರುದ್ದ ಜಡೆಗೆ ಮುಡಿದ ಮಲ್ಲಿಗೆಯಂತೆ,
ಹಿಂದೆ ಅಲೆಯುವ ಸೀರೆಸೆರಗಿನ
ಗಾಳಿಯಂತೆ,
ಗಾಳಿಯಲ್ಲಿ ಬರುವ ಹೂಡಿದೂಳಿನಂತೆ
ಯಾವಾಗಲೂ ನೀ ನನ್ನಲ್ಲೇ ಇರುವೆ
ಸದಾ ನೀರಿನಲಿರುವ ಮೀನಿನಂತೆ
ನೀ ಪ್ರೇತವೆಂದರು,ಭೂತವೆಂದರು…!
ನಾನಂತೂ ನಿನ್ನ ಬೆನ್ನು ಬಿಡೇನು
ನಿನ್ನೊಮ್ಮೆ ತಿರುಗಿ ನೋಡುವಂತಿದ್ದರೆ
ನಾ ಯಾವಾಗಲೂ ನಿನ್ನ ಕಣ್ಣ ಮುಂದೆ
ಕಾಯ ಎರಡಾದರೇನು…?
ಹೃದಯದ ಗರ್ಭದಲ್ಲಿರುವ
ಪ್ರೀತಿ ಒಂದೇ ಅಲ್ಲವೇ..?
ಈ ಬಿಳಿಹಾಳೆಯಲಿ ಅದೆಷ್ಟು ನಾ
ತೋರ್ಪಡಿಸಲಿ
ಅದೆಷ್ಟೇ ನಾ ತೋರ್ಪಡಿಸಿದರೂ
ಅದು ಗುಲಗಂಜಿ ತೂಕವಷ್ಟೇ.
********
