ಕಾವ್ಯ ಸಂಗಾತಿ
ಗಜಲ್
ಅನಸೂಯ ಜಹಗೀರದಾರ
ಸ್ವಲ್ಪ ಮಾತನಾಡುವದ ನಿಲ್ಲಿಸು
ಗೋಡೆಗಳೂ ಮಾತನಾಡುತಿವೆ
ಅಂತರಂಗ ತರಂಗಗಳ ಗಮನಿಸು
ರಾಗಗಳೂ ಜೊತೆಗೂಡುತಿವೆ
ಒಂದೇ ಸಮನೆ ಬೀಳುವ ಮಳೆಗೆ
ನಿಂತ ನೆಲ ಕೊಚ್ಚಿ ಸವೆಯುತಿದೆ
ಬಿಸಿಲ ಕಿರಣಗಳ ವೀಕ್ಷಿಸು ಬೆಳಕ
ಬಣ್ಣಗಳೂ ನರ್ತಿಸುತ್ತಿವೆ
ಬೀಸಿ ಹೊಡೆವ ಚಂಡಮಾರುತಕೆ
ಬಂಡೆಯೂ ತುಣುಕಾಗುತ್ತಿದೆ
ನಿರುಮ್ಮಳ ನಾದವ ಆಲಿಸು
ಸತ್ಯಗಳು ಬಯಲಾಗುತ್ತಿವೆ
ನನ್ನದೆನ್ನುವ ಗಣಿತ ಗುಣಿತಕೆ
ಸಹಸ್ರ ಸಹಸ್ರ ಸೇರುತಿದೆ
ಉಸಿರ ಹಸಿರಲಿ ಚಲಿಸು ಲತೆ
ಮರಗಳೂ ಮುಸಿ ನಗುತಲಿವೆ
ಬಿಸಿಲು ಚಂದ್ರಿಕೆಗೆ ಲಕ್ಷಾಂತರ
ವಿದ್ಯುದ್ದೀಪಗಳು ಸಮವೆ ಅನು
ನಿನ್ನ ಅತಿರೇಕದಾಟವ ನಿಲ್ಲಿಸು ಮಣ್ಣ
ಕಣಗಳೂ ಏರೇರಿ ಹೊಡೆಯುತ್ತಿವೆ
ಸುಂದರ.
ಧನ್ಯವಾದಗಳು ಸರ್..