ಶಾಪ
ಡಾ.ಗೋವಿಂದ ಹೆಗಡೆ
ಶಾಪ
ಸಣ್ಣ ಪುಟ್ಟವು ಸಾಲುವುದಿಲ್ಲ
ಅಂತ
ದೊಡ್ಡ ಹಂಡೆ, ಬಾನಿ, ಕೊಪ್ಪರಿಗೆ
ಗಳನ್ನೇ ಆಳಕ್ಕಿಳಿಸಿದೆ
ಕವಿತೆಗಳ ತುಂಬಿ- ಕೊಂಡು
ಬರಲೆಂದು ಒಡಲ ತುಂಬ
ಖಾಲಿ ಖಾಲಿ ಹೊರಳಿ ಬಂದಿವೆ
ಬಾವಿಲಿ ಜಲ ಬತ್ತಿ ಹೋಯ್ತೆ
ಈಗ ನಡೆದಿದೆ
ಕವಿತೆಯ ಸುಳಿವೇ ಇರದ
ಪೊಳ್ಳು ಪದಗಳ ಸಂತೆ
( ಇದೂ ಅವುಗಳಲ್ಲಿ ಒಂದಂತೆ?!)
**
ಭಾರೀ ಜರಿ ಪೋಷಾಕು
ಆಳೆತ್ತರದ ಹೂ ಹಾರ
ಮಸ್ತು ಗುಲಾಲು ಬಾಜಾ ಬಜಂತ್ರಿ
ಗಳಲ್ಲಿ ನಡೆದಿದೆ
ಶವದ ಮೆರವಣಿಗೆ
ಮೆರೆಸೋದು ಅಂದರೆ ಹಾಗೇ!
ಪಾಪ,ಕವಿತೆ
ಉಡಲು ಸ್ವರಗಳ
ಪತ್ತೆಯೇ ಇರದೆ
( ಉಣಲು ವ್ಯಂಜನ ಸಿಗದೆ-
ಹಸಿದೇ)
ಬತ್ತಲಾಗಿಯೇ ಉಳಿದು
ಮರೆಯಾಗಿದೆ
ಮೆರವಣಿಗೆಯತ್ತ ಇಣುಕಲೂ
ಹೋಗದೇ…
**********
