ಕಾವ್ಯಸಂಗಾತಿ
ಗಜಲ್
ಎ. ಹೇಮಗಂಗಾ
ಇಹ, ಪರದ ಅರಿವೇ ಇಲ್ಲದಂತಾಗಿದೆ ನಿನ್ನಲ್ಲಿರೆ ನನ್ನ ಮನಸು
ಹಸಿವು, ನಿದಿರೆ ಏನೂ ಕಾಣದಂತಾಗಿದೆ ನಿನ್ನಲ್ಲಿರೆ ನನ್ನ ಮನಸು
ನಿನ್ನೊಡನೆ ನನ್ನ ಈ ಪರಿ ಬೆಸೆದ ಶಕ್ತಿಯಾದರೂ ಯಾವುದು ?
ಹಗಲಿರುಳಿನ ಅಂತರ ತಿಳಿಯದಂತಾಗಿದೆ ನಿನ್ನಲ್ಲಿರೆ ನನ್ನ ಮನಸು
ಬಾಳು ಹೊಸ ತಿರುವು ಪಡೆವುದೆಂಬ ನಿರೀಕ್ಷೆ ಕಿಂಚಿತ್ತೂ ಇರಲಿಲ್ಲ
ನನ್ನನ್ನೇ ನಾ ಪೂರ್ಣ ಮರೆತಂತಾಗಿದೆ ನಿನ್ನಲ್ಲಿರೆ ನನ್ನ ಮನಸು
ಮೈ ಸವರುವ ಕುಳಿರ್ಗಾಳಿಯೂ ವಿರಹದ ಬೇಗೆ ತಣಿಸಿಲ್ಲವೇಕೆ ?
ಜೀವಕ್ಕೆ ಜೀವವೇ ನೀನಾದಂತಾಗಿದೆ ನಿನ್ನಲ್ಲಿರೆ ನನ್ನ ಮನಸು
ಮಿಲನದ ಘಳಿಗೆ ಎಂದು ಬರುವುದೋ ತಿಳಿಯದು ಹೇಮ ಳಿಗೆ
ನಿತ್ಯ ಕಾಯುವುದೇ ಕಾಯಕದಂತಾಗಿದೆ ನಿನ್ನಲ್ಲಿರೆ ನನ್ನ ಮನಸು
