ಕಾವ್ಯ ಸಂಗಾತಿ
ಗಜಲ್
ಯಮುನಾ
ಬೆಂಗಾಡಿನ ಕನಸುಗಳ ಆವುಗೆಗೆ ಮುಂಗಾರು ಮಳೆಯಾದವನು ನೀನಲ್ಲವೇ….?
ನಾಚಿಕೆಯ ಪೊರೆ ಕಳಚಿ ಮೋಹದುಡುಗೆಯ ತೊಡಸಿದವನು ನೀನಲ್ಲವೆ….?
ಹನಿಗೆ ನೆಲ ಹಸುರೊಡೆದು ಹೂ ಮೊಗ್ಗು ಹಬ್ಬಗಳದೇ ಸುಗ್ಗಿ
ನೆಲ ಮರೆಯ ಹುಳು ಹತ್ತಿ ಬಳ್ಳಿ ಬಾಡುತಿರಲು – ದೂರಾದವನು ನೀನಲ್ಲವೆ…?
ಮನವು ಮರ್ಕಟವಾಗಿ ಚಂದಿರನ ತಂಪಿಗೆ ಕಾಯುತಿದೆ
ಮೋಡಗಳ ಮರೆಯಲ್ಲಿ ಆಟವಾಡಿದವನು ನೀನಲ್ಲವೇ…?
ಶಾಪಗ್ರಸ್ತ ಶಿಲೆಯು ಬಿಡುಗಡೆಗೆ ಹಂಬಲಿಸಿತು.
ಭವದ ಈತಾಪದಲಿ ಶ್ರೀರಾಮನಾಗದೇ ರಾವಣನಾದವನು ನೀನಲ್ಲವೆ…?
ಗುಡುಗು ಮಿಂಚುಗಳಿದ್ದು ಕಾರ್ಮೋಡಗಳು ಮೊರೆಯುತಿವೆ
ಯಮುನೆಯಾ ಪಾತ್ರದಲಿ ವರುಣಾಗಿ ಹರಿಯದೇ ಬತ್ತಿಹೋದವನು ನೀನಲ್ಲವೆ…..?
About The Author
