ಡಾ.ಡೋ ನಾ ವೆಂಕಟೇಶ ಕವಿತೆ-ಕಲಿ ನಲಿ -

ಕಾವ್ಯ ಸಂಗಾತಿ

ಕಲಿ ನಲಿ

ಡಾ.ಡೋ ನಾ ವೆಂಕಟೇಶ

ಬೆಂಗಳೂರಿಗೆ ಬಂತು ಮಳೆ
ತುಂತುರು ನೀರ ಧಾರೆ
ಮನ ತುಂಬಿ
ಕೆರೆ ಕಟ್ಟೆ ತುಂಬಿ
ಮೇರೆ ಮೀರಿ
ಗಲ್ಲಿ ಗಲ್ಲಿಗಳಲ್ಲಿ ಮನೆ ಮನೆಗಳಲ್ಲಿ
ಆಯಿತು
ಆಸ್ಫೋಟ
ನಿಲ್ಲದ ಆಕ್ರೋಶ

ದೇವಿ ಪ್ರಕೃತಿಗೆ ಮಾಡಿದ
ವಿಕೃತಿ
ಕೆರೆಕಟ್ಟೆಗಳ ತಳ ಬಗೆದು, ಸಿಗಿದು ಆ ದೇವಿಯ
ಒಡಲಾಳ!
ಕಟ್ಟಿದೆ ನಿನ್ನ ದಾಹದ
ಮಜಲು
ಮಜಲು ಮಜಲಾಗಿ ನಿಂತದ್ದು, ನಿರಾಧಾರ ಮಹಲು
ಕುಸಿದಿದ್ದು ಕೊನೆಗೆ
ಆ
ನಿನ್ನದೇ ದಾರಿಗೆ !

ಏನೆಂದು ಹೇಳಲಿ ಗೆಳೆಯಾ ತೀರದಾಸೆಗೆ
ಸಿಗದಾಯಿತು ಹಿಡಿ ನೀರು
ಮೇಲಿಂದ ರೌದ್ರಾವತಾರ
ಕೆಳಗಿಂದ ಕಲ್ಕಿಯವತಾರ

ಕಲಿತು ಕೋ ಚಿನ್ನ ಬದುಕು
ಬದುಕಲು ಬಿಡು
ಬಿಡು ನಿನ್ನ ಢಾಂಬಿಕ ತೆವಲು

ನಮಿಸು ನಿನ್ನ ತಾಯಿಗೆ
ಆ ಭೂ ಮಾತೆಗೆ
ಮಾಡದಿರು ಅಪಮಾನ
ಕ್ಷಮಯಾ ಧರಿತ್ರಿಗೆ

ಬದುಕು
ಬದುಕುವುವ ಕಲೆ
ಕಲಿ ನಲಿ