ಕಾವ್ಯಸಂಗಾತಿ
ಗಜಲ್
ಎ . ಹೇಮಗಂಗಾ
ಮನದಾಳದ ನೋವುಗಳ ಹೊರದೂಡಲು ಬರೆಯುತ್ತೇನೆ ನಾನು
ಬೆನ್ನೇರಿದ ಭೂತ ವಿಳಿಸಿ ಹಗುರಾಗಲು ಬರೆಯುತ್ತೇನೆ ನಾನು
ಋತು ಬದಲಾದರೂ ಕಾಲ ನಿಂತಲ್ಲೇ ನಿಂತಂತೆ ಅನಿಸಿತೇಕೆ ?
ಸುಪ್ತವಾಗಿಹ ಭಾವಗಳ ಎಚ್ಚರಿಸಲು ಬರೆಯುತ್ತೇನೆ ನಾನು
ಇಟ್ಟ ಪ್ರತಿ ಹೆಜ್ಜೆಯಲೂ ನೆತ್ತರು ಒಸರಿದೆ ಮುಳ್ಳ ಹಾದಿಯಲಿ
ಕಲ್ಪನೆಗಳ ತೊರೆಯಲಿ ಮೀಯಲು ಬರೆಯುತ್ತೇನೆ ನಾನು
ಆಘಾತದಿ ನರಳಿದ ಹೃದಯದ ತುಂಬ ಪೆಟ್ಟಿನ ಕುರುಹುಗಳೇ !
ಮಾಯದ ಗಾಯಕೆ ಮುಲಾಮು ಲೇಪಿಸಲು ಬರೆಯುತ್ತೇನೆ ನಾನು
ಬರೆದು ಸಾಧಿಸುವುದಾದರೂ ಏನೆಂದು ಹಲುಬದಿರು ಹೇಮ
ಬದುಕಲ್ಲದ ಬದುಕಲಿ ನನ್ನಿರುವಿಕೆ ತೋರಲು ಬರೆಯುತ್ತೇನೆ ನಾನು
ಹೃದಯಾಂತರಾಳದ ಮಡುಗಟ್ಟಿದ ನೋವನ್ನು ಸುಪ್ತ ಪರದೆಯ ಹಿಂದೆ ತೋರುವ ಈ ನಿಮ್ಮ ಗಝಲ್ ತುಂಬಾ ಚೆನ್ನಾಗಿದೆ ಮೇಡಂ..