ಗಜಲ್-

ಕಾವ್ಯ ಸಂಗಾತಿ

ಗಜಲ್

ವಾಣಿ ಯಡಹಳ್ಳಿಮಠ

ಕೊಡು ಎಂದರೆ ಕೊಡಲೀಗ
ಏನೂ ಉಳಿದಿಲ್ಲ
ಮನದ ಜೋಳಿಗೆಯಲ್ಲೀಗ
ಭಾವನೆಗಳು ಉಳಿದಿಲ್ಲ

ಇರಲು ಬಂದವರೆಲ್ಲ
ಇರಿದಿರಿದು ಹೋದರು .
ಒಲವಿನ ಒಡಲಿನಲ್ಲೀಗ
ಒನಪು ಉಳಿದಿಲ್ಲ

ಮಾತುಗಳು ಮೌನದ ಮಡಿಲು
ಬಯಸಿ ದೂರ ಸಾಗಿವೆ .
ಪೋಣಿಸಲು ಪದಗಳಲ್ಲೀಗ
ಪುಳಕ ಉಳಿದಿಲ್ಲ

ಎದೆಯ ಗೋಡೆಯ ತುಂಬಾ
ನೆತ್ತರಿನ ಕಲೆಗಳೇ ,,
ನೇವರಿಸಿ ಬಳಿಯಲೀಗ
ಹೊಸ ಬಣ್ಣ ಉಳಿದಿಲ್ಲ

ನಿಂತು ಏಕಾಂತದ ಸಂತೆಯಲಿ
ಸ್ನೇಹ ಅರಸಿದೆಯಾ ವಾಣಿ?
ಅರಳಿಸಿ ಹಸಿರಾಗಿಸಲೀಗ
ಹಳೆ ಆಸರೆ ಉಳಿದಿಲ್ಲ


One thought on “ಗಜಲ್-

Leave a Reply

Back To Top