ಕಾವ್ಯ ಸಂಗಾತಿ
ನನ್ನ ಹೃದಯದಿಂದ ನಿಮ್ಮ ಹೃದಯಕ್ಕೆ
ಕಮಲಾ ರಾಜೇಶ್
ನಾರಿಮಣಿ ತಾನೊಪ್ಪಿ ಮುದ್ದಾಡ ಬಯಸಿದರೆ
ಪೌರುಷದ ಗಂಡು ಸಹಕರಿಸಿ ನಲಿಯೆ
ನಾರಿಮಣಿ ಒಪ್ಪದಲೆ ಮುದ್ದಾಡ ಬಯಸಿದರೆ
ಕ್ರೂರಮೃಗ ನೀನಾಗ ಕಮಲಾತ್ಮವೆ
ನನ್ನ ಹೃದಯದಿಂದ ನಿಮ್ಮ ಹೃದಯಕ್ಕೆ
ಶುಭರಾತ್ರಿ
ನೀನಿರದ ರಾತ್ರಿಯಲಿ ನೆನಪುಗಳು ಸುಳಿಯುತಿರೆ
ನಾನೆದ್ದು ಕುಳಿತು ನೋಡಿದೆನು ಸುತ್ತ
ಮೌನದಲಿ ಮಾತಾಡಿ ನಿಶ್ಶಬ್ದ ಸರಿಸಿದರೆ
ನಾನಿನಗೆ ಸಖಿಯಾದೆ ಕಮಲಾತ್ಮವೆ
ನನ್ನ ಹೃದಯದಿಂದ ನಿಮ್ಮ ಹೃದಯಕ್ಕೆ
ಶುಭೋದಯ
ಬೇಲೂರ ಶಿಲೆಯಂತೆ ನೋಡ ಬಯಸಿದ ನಲ್ಲ
ಬೇಲೂರು ಇಲ್ಲ ಬನವಾಸಿ ಇಲ್ಲ
ಮಾಲೂರ ಪಕ್ಕ ಕೋಸಂಬರಿಯೆ ಸವಿಬೆಲ್ಲ
ಕಾಲ ನೂಕಿದಿರಲ್ಲ ಕಮಲಾತ್ಮವೆ
ನನ್ನ ಹೃದಯದಿಂದ ನಿಮ್ಮ ಹೃದಯಕ್ಕೆ ಶುಭೋದಯ
ಸುತನ ಭಂಡಾರವನು ಬರಿದು ಮಾಡುವ ತಂದೆ
ಸುತನ ಏಳ್ಗೆಯನು ಸಹಿಸದ ತಾಯಿಯು
ಜತನದಲಿ ಸೋದರನ ಹಾರೈಸದಿಹ ತಂಗಿ
ಕ್ಷಿತಿಯೊಳಗೆ ಸತ್ತಂತೆ ಕಮಲಾತ್ಮವೆ
