ಗಜಲ್

ಕಾವ್ಯ ಸಂಗಾತಿ

ಅನಸೂಯ ಜಹಗೀರದಾರ

ಗಜಲ್

ಕಣ್ಣಲ್ಲಿ ಹರಿದಾಡುವ ಆ ಕನಸನು
ಹುಡಿಯಾಗಿಸಿ ಚದುರಿಸದಿರು
ಸದಾ ನಿನ್ನ ನೆನಪಿಸುವ ಈ ದೂರವನು
ದೂರ ಮಾಡದಿರು

ಎದೆಯ ಶಿಲ್ಪದಲಿ ಕೆತ್ತಿದ ಆ ಹೆಸರನು
ಉಳಿಯಿಕ್ಕಿ ಅಳಿಸದಿರು
ಹರಿವ ರಕ್ತದಲಿ ಉಸಿರಾದ ನಾಮವ
ದಯಮಾಡಿ ಅಗಲಿಸದಿರು

ನನಗಿತ್ತ ನಾವೆಯೇ ಸಾಕು ಮತ್ತೊಂದು
ಕೇಳಿದರೂ ನೀಡದಿರು
ಸ್ವತ್ವದಲಿ ನೆಲೆಯಾದ ನನ್ನತನವನು ನಿನ್ನ
ಆಮಿಷಕೆ ದಾಳವಾಗಿಸದಿರು

ಆಷಾಢ ಮಳೆಗೆ ಅಂಕುರಿಸಿದ ಬೀಜವ
ಒಣ ಹವೆಗೆ ಒಣಗಿಸದಿರು
ಹಸಿರು ಚಿಗುರು ಎಲೆ ಮೂಡುತಿರುವ ಆ
ದೇಟನು ಕಮರಿಸದಿರು

ಧೃಡ ಸಂಕಲ್ಪದಿ ಬರೆದ ಈ ಗಜಲನು ನಿನ್ನ
ನುಡಿಯಲಿ ಸಂಪನ್ನಗೊಳಿಸದಿರು ಅನು
ನನ್ನ ತಲ್ಲೀನವಾಗಿಸಿಹ ಆ ಮಧುರ
ಅನುಭೂತಿಯನು ಅಂತ್ಯವಾಗಿಸದಿರು

---