ಚಿವುಟದಿರಿ ಬದುಕ

ಕಾವ್ಯ ಸಂಗಾತಿ

ಚಿವುಟದಿರಿ ಬದುಕ

ಜಯಲಕ್ಷ್ಮಿ ಎಂ ಬಿ

ಕಸಿಯದಿರಿ ಬಾಲ್ಯವನು ಸೆಳೆಯದಿರಿ ಬದುಕನ್ನು
ಕುಸಿಯುವುದು ಆಸೆಗಳ ಬಹುಮಹಡಿಯು
ಹುಸಿಯಾಸೆ ತೋರುತಲಿ ಎಳೆಯದಿರಿ ಕೆಲಸಕ್ಕೆ
ಬಸವಳಿದು ಹೋಗುವರು ದುಡಿಮೆಯಿಂದ

ಮಕ್ಕಳನು ಪೋಷಿಸದೆ ಎಳೆಮನವ ಚಿವುಟಿದರೆ
ದಕ್ಕುವುದು ನರಕವದು ಬಲುನಿಶ್ಚಿತ
ಸೊಕ್ಕಿನಲಿ ದುಡಿಸಿದರೆ ಕಡುಪಾಪ ಸುತ್ತುವುದು
ಹಕ್ಕಿಲ್ಲ ಬಾಲಕಾರ್ಮಿಕತೆಗೆಂದು

ಶಿಕ್ಷಣವ ಮಕ್ಕಳಿಗೆ ಒದಗಿಸುತ ಸಲಹಿದರೆ
ರಕ್ಷಣೆಯು ಬಾಲ್ಯದಲಿ ದಕ್ಕುತಿಹುದು
ತಕ್ಷಣಕೆ ದುಡಿಮೆಯನು ಹೊರುವಂತೆ ಹಚ್ಚಿದರೆ
ಶಿಕ್ಷಣದಿ ವಂಚನೆಗೆ ಸಿಲುಕುತಿಹರು

ದೇಶವದು ಹೊಂದುವುದು ಏಳ್ಗೆಯನು ಪ್ರತಿನಿಮಿಷ
ತೋಷವದು ದೊರೆಯುವುದು ಕಲಿಕೆಯಿಂದ
ಪಾಶವನು ಬಿಗಿಯದೆಲೆ ಮಕ್ಕಳನು ಸಲಹಿದೆಡೆ
ದೋಷವದು ಕಳೆಯುವುದು ಬದುಕಿನಿಂದ

---

ಜಯಲಕ್ಷ್ಮಿ ಎಂ ಬಿ