ಕಾವ್ಯ ಸಂಗಾತಿ
ನೆಲೆ ಎಲ್ಲಿ ಈಗ.
ಡಾ. ನಾಗರತ್ನ ಅಶೋಕ ಭಾವಿಕಟ್ಟಿ
ಮಲಗಿದರಿವ ಬಡಿದು
ಎಚ್ಚರಿಸಿ ಕೇಳುತಿದೆ ನಾಡಿನ ಭವಿತವ್ಯ
ಎತ್ತ ಕಡೆ ಪಯಣ
ನೆಲೆ ಎಲ್ಲಿ ಈಗ
ತನ್ನತನವ ಮಾರಿಕೊಂಡು
ಮುಖವಾಡ ಧರಿಸಿ ನಕ್ಕು ನಗಿಸಿ
ಹೊಂಚು ಹಾಕುತ ಸಂಚು ಮಾಡಿ
ಸಿಕ್ಕ ಸಿಕ್ಕದುದ ದೋಚಿಕೊಂಡು
ಸೋಗಲಾಡಿತನದ ಕಳ್ಳ ನಾಯಕರಿರಲು
ಶಕ್ತಿದೈವದ ಹೆಸರು ಕೊಟ್ಟು
ಗಾಳಿಯಾಡದ ಗರ್ಭ ಗುಡಿಯಲಿ
ಕೂಡಿಹಾಕಿ
ಶಾಂತಿಗಾಗಿ ಬಲಿ ಕೊಟ್ಟು
ತಿಂದು ತೇಗಿ ಮಜಾ ಮಾಡುವ
ಸಮಾಜ ಸುಧಾರಕ ನಯವಂಚಕರಿರಲು
ತಾಯಿನೆಲದ ಏಳ್ಗೆಗಾಗಿ
ಸಾಕ್ಷರತೆಯ ಪಣವ ತೊಟ್ಟು
ಪೆನ್ನು ಹಿಡಿವ ಕೈಗಳಲೀಗ
ಮದ್ದು ಗುಂಡು ತಾಲೀಮು ಕೊಟ್ಟು
ದೇಶವನ್ನೆ ದೋಚುತಿರುವ
ದೇಶಭಕ್ತಿಯ ಭ್ರಷ್ಟರಿರಲು
ಮನುಷ್ಯತ್ವಕ್ಕೆ ಬೆಂಕಿ ಹಚ್ಚಿ
ಅದರ ಬಿಸಿಯಲ್ಲಿ ಚಳಿ ಕಾಯಿಸುತ
ಕಂಡುದೆಲ್ಲವು ತಮ್ಮದೆಂದು
ಹುಕಾಯಿ ಹಣ್ಣು ಪೀಚು ಬಿಡದೆ
ರಕ್ತ ಹೀರಿ ತೃಪ್ತಿ ಪಡುವ
ಪಾಪಿ ಕಾಮಪಿಶಾಚಿಗಳಿರುತಿರಲು
ಎತ್ತ ಕಡೆ ಪಯಣ
ಯಾವುದರ ಹುಡುಕಾಟ
ನೆಲೆ ಎಲ್ಲಿ ಈಗ.
ಡಾ. ನಾಗರತ್ನ ಅಶೋಕ ಭಾವಿಕಟ್ಟಿ
