ವಿಶೇಷ ಲೇಖನ
ಪರಿಸರ ದಿನಾಚರಣೆಗಾಗಿ ವನ ಸಿಂಚನ
ಅರುಣಾ ರಾವ್
ಕೂಜನದ ರಿಂಗಣಕೆ ಹಾಡಾಗಿದೆ ಕಾನನ
ತಂಗಾಳಿ ತೀಡುತಲಿ ಸುತ್ತಿಸುಳಿದು ಬನಬನ
ಕಣ್ ಹರಿಯಲೆತ್ತೆತ್ತೆ ಹಸಿರಿನದೇ ಚೇತನ
ನೋಡುವ ಮೈಮನಗಳಲಿ ಆನಂದದ ಕಂಪನ
ಹೆಜ್ಜೆಗಳಿಗೆ ಗೆಜ್ಜೆಯಾದ ಪರ್ಣಗಳ ಹಾಸುಗೆ
ದಿಗಂತದಿ ಒಂದಾಗಿಹ ಭುವಿ ಬಾನಿನ ಬೆಸುಗೆ
ತರುಲತೆಗಳಲಿ ಕಾಣ್ವ ರಾಶಿ ರಾಶಿ ಹೂ ನಗೆ
ಬೆಟ್ಟ ಗುಡ್ಡಗಳ ಮೇಲ್ಮೆ ಹಸಿರ ಹುಲ್ಲ ಅಪ್ಪುಗೆ
ಜುಳುಜುಳನೆ ಹರಿಯುತಿಹ ಜೀವ ಜಲತರಂಗಿಣಿ
ಧುಮ್ಮಿಕ್ಕಿ ಕಂಗೊಳಿಪ ನೊರೆವಾಲಿನ ರಾಗಿಣಿ
ವೇಗವೇನು ಒನಪದೇನು ನಿಲ್ಲೆ ರಾಗ ರಂಜಿನಿ
ನೀನೆ ಮಾತೆ ನೀನೆ ದಾತೆ ನಿತ್ಯ ಸಂಜೀವಿನಿ
ಅರುಣಾ ರಾವ್
