ಬದಲಾಗಲು ಬಯಸಿದ್ದೇನೆ

ಕಾವ್ಯ ಸಂಗಾತಿ

ಬದಲಾಗಲು ಬಯಸಿದ್ದೇನೆ

ಒಲವು

ಬದಲಾಗಲು ಬಯಸಿದ್ದೇನೆ
ಮುಂದೆ ಮೊದಲಿನಂತೆ ಇರುವುದಿಲ್ಲ

ತೋಟದಲ್ಲಿ ಅರಳಿನಿಂತ
ಹೂವುಗಳ ಕಂಡೂ ಕೀಳುವುದಿಲ್ಲ
ಅವುಗಳ ಸೌಂದರ್ಯ ಕಂಡು
ಮೈ ಮರೆತು ತನ್ಮಯಳಾಗುತ್ತೇನೆ

ಹೆಚ್ಚಿದ ಬ್ಯಾಂಕ್ ಬ್ಯಾಲೆನ್ಸ್
ನೋಡಿಯೂ ಹಣ ಬಿಡಿಸುವುದಿಲ್ಲ
ಅನ್ನ ನೀರಿಲ್ಲದೆ ಪರದಾಡುತ್ತಿರುವವರಿಗೊಂದು
ಪಾಲು ಕೂಡಿಡಲು ಯೋಜನೆ ರೂಪಿಸುತ್ತೇನೆ

ಬಟ್ಟೆ, ಚಪ್ಪಲಿ ಅಂಗಡಿ ಮುಂದೆ
ನಡೆವಾಗಲೂ ಕತ್ತೆತ್ತಿ ನೋಡುವುದಿಲ್ಲ
ಸ್ನೇಹಿತರೊಡನೆ ಕುಳಿತು ಹರಟೆ ಹೊಡೆದು
ಸಮಯ ವ್ಯರ್ಥ ಮಾಡುವುದಿಲ್ಲ

ವೃಥಾ ವ್ಯಯಿಸುವ ಹಣ, ಸಮಯವನ್ನು
ಕಣ್ರೆಪ್ಪೆಯಂತೆ ಕಾಪಿಡಲು ಮುಂದಾಗುತ್ತೇನೆ

ಟೇಬಲ್ ಮೇಲೆ ಅಲಂಕರಿಸಿ ಜೋಡಿಸಿಟ್ಟ
ಸ್ನ್ಯಾಕ್ಸ್, ಹಣ್ಣು-ಹಂಪಲುಗಳ
ಕಂಡೂ ಕಾಣದಂತೆ ಇರುತ್ತೇನೆ

ಹಸಿವಿಲ್ಲದ್ದಾಗಲು ತಿಂದು
ಹೊಟ್ಟೆ ಹಾಳುಮಾಡುವ
ನಾಲಿಗೆ ಚಪಲಕ್ಕೆ ಬುದ್ಧಿ ಹೇಳುತ್ತೇನೆ

ನಿಲ್ಲದ ಆಸೆಗಳ ನಿರಂತರತೆಗೆ
ಇತಿಶ್ರೀ ಹಾಡಲಾಗುವುದಿಲ್ಲ ಬದಲಾಗಿ
ಮುಗಿಯದ ದಾರಿಗೊಂದು ತಿರುವು ನೀಡಿ
ಬದಲಾಗಲು ಬಯಸಿದ್ದೇನೆ.

---