ಕಾವ್ಯ ಸಂಗಾತಿ
ಅರಿವು
ಎಂ.ಆರ್. ಅನಸೂಯ
ಹಾದಿಯನ್ನು ಸವೆಸುವುದೇ ಪಯಣವಲ್ಲ
ಗಮನಿಸುತ್ತ ಹಾದಿ ಬದಿಯ ನೋಟವನ್ನು
ಗುರಿ ಸೇರುವುದೆ ಪಯಣ
ಶಿಕ್ಷಣವೆಂದರೆ ಪದವಿಗಳ ಮೊತ್ತವಲ್ಲ
ಆತ್ಮಶ್ರೀಗಾಗಿ ನಿರಂಕುಶ ಮತಿಗಳಾಗುವ
ವೈಚಾರಿಕ ಅರಿವು ಪಡೆವುದೇ ಶಿಕ್ಷಣ
ಪೂಜೆಯೆಂದರೆ ಧೂಪ ದೀಪದಾರತಿಯಲ್ಲ
ಕಾಯಕವೇ ಕೈಲಾಸವೆಂದರಿತ ಭಾವದ
ಅರ್ಪಣಾ ದುಡಿಮೆಯೇ ಪೂಜೆ
ಪ್ರೀತಿಯೆಂದರೆ ನಿರೀಕ್ಷೆಗಳ ಅಗತ್ಯವಲ್ಲ
ತನುವಿನೊಳಗಿರುವ ಆತ್ಮದಂತೆ ಸಮರಸದ
ಬೆಚ್ಚನೆಯ ಭರವಸೆಯೇ ಪ್ರೀತಿ
ಸ್ನೇಹವೆಂದರೆ ಮಾತಿನ ಸಿಹಿ ಲೇಪನವಲ್ಲ
ಕಟುಸತ್ಯದ ನಿಷ್ಠುರತೆಯ ಕಹಿ ಮದ್ದಿನ
ಹಿತೈಷಿ ಭಾವದ ಕಳವಳವೇ ಸ್ನೇಹ
ಸಂತನೆಂದರೆ ಧ್ಯಾನದಿ ಕಣ್ಮುಚ್ಚಿ ಕುಳಿತವನಲ್ಲ
ನಿರಪೇಕ್ಷ ಸೇವೆಯಲಿ ಸದ್ದಿಲ್ಲದೆ ತೊಡಗಿ
ವನಸುಮದಂತೆ ಬದುಕಿದವನೇ ಸಂತ
ಮಾನ್ಯ ಸಂಪಾದಕರೇ, ತಮ್ಮಲ್ಲಿ ಕವನಗಳನ್ನು ಮಾತ್ರ ಪ್ರಕಟಿಸುತ್ತೀರಾ ಅಥವಾ ಕಥೆಗಳನ್ನೂ ಪ್ರಕಟಿಸುತ್ತಿರಾ ಏಂಬುದು ನನಗೆ ದಯಮಾಡಿ ತಿಳಿಸುತ್ತೀರಾ. ಧನ್ಯವಾದಗಳೊಂದಿಗೆ; ಬಿ.ಟಿ.ನಾಯಕ್.