ಕಾವ್ಯಯಾನ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಖಾಲಿಯಾಗುವುದೆಂದರೆ…

ಎಸ್ ನಾಗಶ್ರೀ

ಖಾಲಿಯಾಗುವುದೆಂದರೆ
ಇರುವುದೆಲ್ಲಾ ಹೊರಚೆಲ್ಲಿ
ಶುಭ್ರವಾಗುವುದಲ್ಲ
ಯಾರಿಗೋ ಕೊಟ್ಟು
ಸಿಗುವ ತೃಪ್ತಿಯಲ್ಲ
ಇಲ್ಲಿಂದ ಮತ್ತೆಲ್ಲಿಗೋ ಸುರಿದು
ಎಲ್ಲಿಂದಲೋ ಹೊತ್ತು ತರುವ
ಹೊಸದೊಂದು ಪೆಟ್ಟಿಗೆಯಲ್ಲ

ಹಕ್ಕಿ ಹಾರಿ ಉಳಿಸಿದ ಪಂಜರ
ಬೆಕ್ಕು ಉರುಳಿಸಿಟ್ಟ ಹಾಲುಗಡಿಗೆ
ಬೆರಳು ಚೀಪಿ ಬಳಿದು ನೆಕ್ಕಿದ ಎಂಜಲುತಟ್ಟೆ
ಅವನು ಉಳಿಸಿಟ್ಟು ಹೋದ ಕುಡಿಗೂಸು
ಬರಿಯ ಮಾತಲ್ಲಿ ಉಳಿದ ಪ್ರೇಮ
ಎದೆಯ ಕಡಲೊಳಗೆ ಅಡಗಿಹೋದ ಶೋಕದಲೆ
ಎಂದೋ ಬರುವ ದೂರತೀರ ನೌಕೆ
ಖಾಲಿಯಾಗುವುದೆಂದರೆ
ಇರುವುದೆಲ್ಲಾ ಕಳೆದಂತಲ್ಲ
ಎಲ್ಲವೂ ಇದ್ದೂ ಇರದಂತೆ
ಇರದದ್ದು ಎದೆಯೊತ್ತಿದಂತೆ
ಒಡಲೊಳಗೆ ಜ್ವಾಲೆಯುರಿದು
ಕೆಂಡವಾದಂತೆ ಕರುಳು
*********************