ಒಡಲ ಸತ್ಯ

ಕವಿತೆ

ಒಡಲ ಸತ್ಯ

ನಾಗರಾಜ್ ಹರಪನಹಳ್ಳಿ

ಬರೆದು ಅಳಿಸುವುದು
ಬರೆಯಲಾಗದ್ದು
ಮನದಲ್ಲೇ ಉಳಿಯುವುದು
ಭೂಮಿಯಲ್ಲಿ ಪಿಸುಗುಡುವ ಬೀಜದಂತೆ

ಹೇಳದ್ದು , ತುಟಿಗೆ ಬಂದು ನಿಂತದ್ದು
ತುಟಿಯಿಂದ ತುಳುಕದ್ದು
ನದಿಯೊಳಗೆ ಮಾತಾಡುವ ಮೀನಿನ ದನಿಯಂತೆ

ಕಂಡದ್ದು, ಕಾಣಲಾಗದ್ದು
ಹೃದಯದ ಕಣ್ಣಿಗೆ ಮಾತ್ರ ಕಂಡದ್ದು
ಹೊರ ಜಗತ್ತಿಗೆ ಕೂಗಿ ಹೇಳಲಾಗದ್ದು
ಎಂದು ತಲುಪದ ಆಗಸದ
ಚಂದ್ರ ದೂರದಲ್ಲೇ
ಕಣ್ಣು ಹೊಡೆದಂತೆ

ಎಲ್ಲೋ ಇರುವ , ಇರುವು
ಎಂದೂ ತಲುಪದವನ (ಳ)
ತಲುಪುವುದು ;
ಮುಟ್ಟದೇ ಮುಟ್ಟುವುದು
ಹೂವೊಳಗಿನ ಪರಿಮಳ ದಂತೆ

*******************