ಮುಂಗಾರಿನ ಮುಸ್ಸಂಜೆ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕವಿತೆ

ಮುಂಗಾರಿನ ಮುಸ್ಸಂಜೆ

ಡಾ. ನಿರ್ಮಲಾ ಬಟ್ಟಲ

ಮುಂಗಾರಿನ ಮೂರು
ಸಂಜೆಯಲಿ ಸುರಿದು
ಜಿಟಿ ಜಿಟಿ ಮಳೆಗೆ ಮೌನ ಮುರಿದ
ಕಪ್ಪೆಗಳೆಲ್ಲಾ ಕೆರಳಿ
ಹಳೆಯ ರಾಗದಲ್ಲೆ ಅರಚುತ್ತಿವೆ
ಅವುಗಳಿಗಿಗ ರಸಿಕತೆ ಸಮಯ….!!

ಪುಟ್ಟ ಮರಿಗಳ ಹೊಟ್ಟೆಗಾಗಿ ಹುಳಹುಪ್ಪಟೆಳ ಹೆಕ್ಕಿಹೆಕ್ಕಿ
ಹೈರಾಣಾದ ಹಕ್ಕಿಗೀಗ
ಜೋಗುಳ ಗಾನ ಮರೆತಿದೆ
ಅದಕಿಗ ನಾಳೆಯ ಚಿಂತೆ ಹೊದ್ದು ಮಲಗುವ ನಿದ್ದೆ ಸಮಯ…..!!

ಒಲೆ ಮುಂದೆ ಬೆಂದು
ನಿಂದನೆಗೆ ಕುದ್ದು
ತಿರಸ್ಕಾರಕ್ಕೆ ಕೊರಗಿದ ಅವಳಿಗೆ
ಹೊರ ಬಿಳಲಾರದಂತೆ
ಎದೆಯ ಸಂಕಟಗಳನು ಸೆರಗಿನಲ್ಲಿ ಗಂಟುಹಾಕುವ ಸಮಯ…..!!

ಊರಾಚೆಯ ಒಂಟಿ ಮನೆಯಲಿ
ಬಾರದವರಿಗಾಗಿ ಕಾಯುತ
ಮರೆತುಹೋದ ವಿರಹಗೀತೆ
ಗುನುಗುತ್ತಾ ಜಾರಿದ ಹರೆಯದ
ಸೆರಗು ತೀಡುತ ಕನ್ನಡಿಯ
ಮುಂದೆ ನೆರೆಗೆರೆ ಎಣಿಸುತಿರುವ ಅವಳಿಗೆ ಬಾಗಿಲಮುಂದೆ
ದೀಪ ಹಚ್ಚಿಡುವ ಸಮಯ….!!

ಮುಂಗಾರಿನ ಭಾರದ ಮೊಡವಿಗ
ಹನಿಯೊಡೆದು ಹಗುರಾಗಿದೆ ಮಳ್ಳನಂತೆ ಆಗಸದಂಗಳಕೆ
ಇಣುಕಿದ ಚಂದಿರ ಬೆಳಕಚೆಲ್ಲಿ ಕಾರಹುಣ್ಣಿಮೆಯ ರುಜುವಾತು ಮಾಡುವ ಸಮಯ….!!

************************