ಕವಿತೆ
ಹಕ್ಕಿ ಹಾರುತಿದೆ
ಅಕ್ಷತಾ ರಾಜ್
ಬಾನು ಬಯಲಿನಲಿ ಮುಗಿಲ ಮರೆಯಲಿ
ಹಕ್ಕಿ ಹಾರುತಿದೆ ನೋಡಿದಿರಾ !
ಬೆಳಕು ಗರಿಗಳ ಹೊತ್ತು ಕುಣಿಯುತಿದೆ
ಏನು ಈ ಪರಿ ಸೋಜಿಗ !
ಮೂಡಣದ ರಜತ ಬೆಟ್ಟದಲಿ
ಅಂಬೆಗಾಲನು ಹಾಕುತಿದೆ
ಪಡುವಣ ಕಡಲಿನ ಬಿಸಿ ಅಬ್ಬಿಯಲಿ
ಮೀಯಲೆಂದು ಸಾಗುತಿದೆ ||ಬಾನು||
ಮೇಘ ನೆಂಟರ ಜಂಟಿ ಕೂಟವು
ಜತನದಲಿ ಹೊತ್ತು ತಿರುಗುತಿದೆ
ಬಿದ್ದಾಗ ಅತ್ತು, ಎದ್ದಾಗ ನಕ್ಕು
ಪುಟಿದೆದ್ದು ಹಕ್ಕಿ ಹಾರುತಿದೆ ||ಬಾನು||
ಹಗಲು – ಇರುಳಿನ ಕಂದನೀತ
ಜಗವೇ ತೂಗುವ ತೊಟ್ಟಿಲು
ಬೆಳ್ಳಿ ಕಿರಣ ರೆಕ್ಕೆ ಬಡಿಯುತಾ
ಹಕ್ಕಿ ಹಾರುತಿದೆ ನೋಡಿದಿರಾ ||ಬಾನು||
*********
