ಬಸ್ಸಿನಲ್ಲಿ.. - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕವಿತೆ

ಬಸ್ಸಿನಲ್ಲಿ..

ಡಾ. ಅರಕಲಗೂಡು ನೀಲಕಂಠ ಮೂರ್ತಿ.

Dream Journey by artist Shashikant Charbe | Fiberglass On Board Mixed Media Paintings

ಇದು ಬಸ್ಸನೇರಿದ ಹಾಗೆ:
ಹತ್ತಿ ಒಳಗೆ ಸೇರಿದ್ದಾಗಿದೆ
ಪ್ರಯಾಣವಂತೂ ಗ್ಯಾರಂಟಿ ಈಗ
ಎಷ್ಟು ದೂರ ಆದರೇನು
ಮತ್ತು ಎಷ್ಟು ಹೊತ್ತಾದರೇನು
ಕುಳಿತಾದರೂ ನಿಂತಾದರೂ
ಕಡೆಗೆ ತಳ್ಳಾಡಿಸಿಕೊಂಡಾದರೂ
ಹೋಗಲೇಬೇಕು
ಸ್ಥಳ ಬಂದಾಗ ಇಳಿಯಲೇಬೇಕು
ಇದು ಪ್ರಯಾಣ
ಇದೇ ಇಲ್ಲಿನ ನಿಜ ಪ್ರಯಾಣ…!

ದೊರಕಿತೇ ಸೀಟು ಕೂರಿ
ಇಲ್ಲ ತಾಳ್ಮೆಯಲಿ ನಿಲ್ಲಿರಿ
ಮುಖ ಕಂಪೇರಲೇಬೇಕೆ
ನಿಮ್ಮ ಅಶಾಂತಿಯ ರಂಗು
ವಾಂತಿ ಆಗಲೇಬೇಕೆ
ಇನ್ನೊಬ್ಬರ ಮೇಲೆ…!
ವಿಚಾರಿಸಿ ನೋಡಿ
ಹೊಂದಿಕೊಳ್ಳುವ ಮನಸಿನವರಿದ್ದರೆ
ಜರುಗುತ್ತಾರೆ
ನಿಮಗೂ ಒಂದಿನಿತು ತಮ್ಮ ತಾವು
ಸರಿದು ನೀಡುತ್ತಾರೆ
ಇಲ್ಲ ಅವರೂ ಇಳಿವವರೇ ತಾನೆ
ಆಗ ಆ ಜಾಗ ನಮದೆ
ಮುಂದೆ ನಿಮಗಾಗಿ ನಿರ್ವಾಹಕ ಸೀಟಿ ಊದುವವರೆಗೆ
ಆಗ ನೀವೂ ಇಳಿವವರೆ
ಅಷ್ಟೆ ನೋಡಿ ಈ ಪ್ರಯಾಣ