ಕಾವ್ಯಯಾನ

ರೊಕ್ಕದಿ ದಕ್ಕದೊಡವೆ ಅವಳು

ನಿನ್ನ ಹೆತ್ತು ಹೊತ್ತವಳು ಹೆಣ್ಣು
ವಾತ್ಸಲ್ಯದಿ ಸಲಹಿದವಳು ಹೆಣ್ಣು
ಅವಳ ಮೇಲೆ ಹಸಿದ ಪಿಶಾಚಿಗಳ ಕಣ್ಣು
ಕಾಮದಬ್ಬರದಿ ಸಿಲುಕಿ ಆದಾಳೋ ಮಣ್ಣು

ಹೆಜ್ಜೆ ಹೆಜ್ಜೆಗೂ ಸಜ್ಜಿಕೆಯನ್ನೇರಿ
ಯಶಸ್ಸಿನ ಮುಕುಟ ಧರಿಸಿದರು
ಕಾಮ ಪಿಪಾಸುಗಳ ಹಸಿವಲಿ
ನಲುಗಿಹಳು ಕಮರಿಹಳು

ಬಡಪಾಯಿ ಹೆಣ್ಣ ತಿನ್ನುವ
ಆಸೆ ಏಕೆ ಪಿಪಾಸುಗಳೇ
ಈ ಘೋರ ತುಂಬಿದ ಕೃತ್ಯಕ್ಕೆ
ಬೀದಿ ನಾಯಿ ಕಣ್ಣೀರಿಡುತ್ತಿದೆ

ಅವಳ‌ ಹರಿದು ಸೊಕ್ಕಲ್ಲಿಮುಕ್ಕವೆಯಾ
ಹೊಕ್ಕಳಿನ ನಂಟಿಟ್ಟು ಮುತ್ತಿಕ್ಕಿದ
ಸಂಕುಲದವಳು, ರಕ್ಕಸನು ಹೊಕ್ಕಿದನೇ
ನಿನ್ನ ರೊಕ್ಕದಿ ದಕ್ಕಿಸಲಾರದ ಒಡವೆಯವಳು

ಅಳಿಸದಿರು ಕಣ್ಣೀರು ತರಿಸದಿರು
ನಿನ್ನಾಸೆಯ ಹಸಿವಲ್ಲಿ ದಹಿಸದಿರು
ಅವಳ ಮನಸು ನೋಯಿಸದಿರು
ಹಸಿವ ಹಿಂಗಿಸಿ ಉಸಿರಾಡಲು ಬಿಡು

****************************************

ಚಂದ್ರು ಪಿ.ಹಾಸನ