ಕವಿತೆ
ಏಕಾಂತವೆಂಬ ಹಿತ
ಶ್ರೀದೇವಿ ಕೆರೆಮನೆ
ಇಷ್ಟಿಷ್ಟೇ ದೂರವಾಗುವ
ನಿನ್ನ ನೋಡಿಯೂ ನೋಡಲಾಗದಂತೆ
ಒಳಗೊಳಗೇ ನವೆಯುತ್ತಿದ್ದೇನೆ
ಹೇಳಿಯೂ ಹೇಳಲಾಗದ
ಒಂಟಿತನವೆಂಬ ಕೀವಾದ ಗಾಯಕ್ಕೀಗ
ಮಾಯಲಾಗದ ಕಾಲ
ಮುಲಾಮು ಸವರಲು ನಿರಾಕರಿಸುತ್ತಿದೆ
ಅಸಹಾಯಕಳಾಗಿ ನೋಡುತ್ತಿದ್ದೇನೆ
ನಮ್ಮಿಬ್ಬರ ನಡುವೆ
ಕ್ಷಣ ಕ್ಷಣಕ್ಕೂ ಹೆಚ್ಚುತ್ತಿರುವ ಅಂತರವನ್ನು
ಎಂದೋ ಆಡುವ ಎರಡೇ ಎರಡು
ಮಾತಿನ ನಡುವೆಯೇ
ಒತ್ತರಿಸಿ ಬರುವ ಯಾವುದೋ ರಾಜಕಾರ್ಯ
ಮಾತು ಹಠಾತ್ತನೆ ನಿಂತು
ಒಂದು ನಿಮಿಷ ಎಂದು ಹೊರಟ ನಿನಗೆ
ಕಾಲ ಗಳಿಗೆಗಳ ಹಂಗಿಲ್ಲ
ಕಾದು ಕುಳಿತ ನನಗೆ ಮಾತ್ರ
ಪ್ರತಿ ಕ್ಷಣವೂ ವರುಷವಾಗುತ್ತಿರ ಭಯ
ಮತ್ತೆ ಮಾತನಾಡುವ ಸಮಯಕ್ಕಾಗಿ
ನಾನು ಜಾತಕಪಕ್ಷಿಯಾಗಿ ಕಾಯುತ್ತಿದ್ದರೆ
ಎಂದೂ ಮುಗಿಯದ ನಿನ್ನ ಕೆಲಸಗಳು
ಈ ಜನ್ಮದಲ್ಲಿ ಮಾತನಾಡಲು ಬಿಡದಂತೆ
ಸದಾ ಸತಾಯಿಸುತ್ತವೆ
ಈಗೀಗ ನಿಜದ ಅರಿವಾಗುತ್ತಿದೆ
ಮಾತಿನ ನಡುವಿನ ಒಂದು ನಿಮಿಷ
ಪುರುಸೊತ್ತಿರದ ಕೆಲಸ
ಎಲ್ಲವೂ ನಿನ್ನದೇ ಸೃಷ್ಟಿಯೆಂಬುದು
ಸಮಯವೇ ಸಿಗದು ಎಂಬ ಮಾತಿನ
ಪೊರೆಕಳಚಿ ನಿಜದ ದರ್ಶನವಾಗುತ್ತಿರುವಾಗ
ಭ್ರಮೆಗಳೆಲ್ಲವೂ ಹರಿದು ಬಯಲಾಗುತ್ತಿದೆ
ಹಿಂದೆ ಕಿತ್ತಿಡುವ
ನಿನ್ನ ಹೆಜ್ಜೆ ಗಳಿಗೆ ನೂರಾನೆಯ ವೇಗ
ನನಗೋ ಎದೆಯ ಮಿಡಿತ ಕಿವಿಗಪ್ಪಳಿಸಿ
ಮುಂದಡಿಯಿಡಲಾಗದ ಸರಪಳಿ
ತಡೆಯಲಾರೆ ದೂರವಾಗಲು ಬಯಸುವವರನ್ನು
ಹಿತವೆನಿಸುತ್ತಿದೆ ಈಗೀಗ ಏಕಾಂತವೂ
************************
ಚೆನ್ನಾಗಿದೆ
ಚನ್ನಾಗಿದೆ. ನಮಸ್ತೆ
ಮಾತು ಬಯಸುವ ಮನ,ಅನುಭವಿಸುವ ವೇದನೆ ಚನ್ನಾಗಿ ಕಾವ್ಯವಾಗಿದೆ.ಒಂಟಿತನ ಹಿತವೆನಿಸುತ್ತಿದೆ..ಕವಿತೆ ಚಂದವಿದೆ ಶ್ರೀದೇವಿ ಮೇಡಮ್.
Very nice
ಚೆಂದದ ಅಭಿವ್ಯಕ್ತಿ….
ಚೆನ್ನಾಗಿದೆ.
ಸೊಗಸಾದ ಕವಿತೆ ..ಒಂಟಿತನದ ಬೆಗೆಯನ್ನು ವಿವರಿಸಿದ ಬಗೆ ಚೆಂದವಾಗಿ ಮೂಡಿದೆ….ಸೂಪರ್.
ಮುಲಾಮು ಸವರಲು ನಿರಾಕರಿಸುತ್ತಿದೆ ಕ್ಷಣ ಕ್ಷಣಕ್ಕೂ ಹೆಚ್ಚುತ್ತಿದೆ ಅಂತರ…..
ಈ ಕಾಲವೂ ಹೀಗೆಯೇ ಸಿದ್ಧಾಂತಗಳಿಗೆ ಜೋತುಬಿದ್ದು ಜನಸಾಮಾನ್ಯರ ಉರುಳಿಗೆ ತರುತ್ತಿದೆ….
ಮುಲಾಮು ಹಚ್ಚಲು ಪುಕ್ಕ ಸಾಕು ಆದರೆ ಕತ್ತಿಯಿಂದ ಸವರಿ ಮತ್ತೆಷ್ಟುಝ ಗಾಯ ಆಗಿಸುವ ಈ ಭರತವರ್ಷದ ಏಕಾಂತದ ಕಾಲ…
ಕವಿತೆ ಈ ಕಾಲದವನ ಏಕಾಂತದಂತೆ…. ಚಂದ ಬರೆದಿದ್ದೀರಿ ಸಿರಿಯಮ್ಮ
ಬಹಳ ಸುಂದರ ಅರ್ಥ ತುಂಬಿದ ಕವಿತೆ
ಚೆಂದದ ಕವಿತೆ, ಸುಂದರ ಅಭಿವ್ಯಕ್ತಿ ಶ್ರೀದೇವಿಯವರೆ
ಕವಿತೆ ಅಪ್ಯಾಯಮಾನವಾಗಿದೆ. ಶಬ್ದಗಳ ಆಯ್ಕೆ ಖುಷಿಕೊಡುತ್ತದೆ.
Very nice and meaningful
Very nice n meaningful
ಚೆನ್ನಾಗಿದೆ…..
ಜೀವನದ ನಾಲ್ಕು ಅವಸ್ಥೆ ಯನ್ನು ನೆನಪಿಸುವ ಕವನ
ತುಂಬಾ ಚೆನ್ನಾಗಿ ಭಾವನೆಗಳನ್ನು ವ್ಯಕ್ತಪಡಿಸಿದೆ.
ಬಹಳ ಚೆನ್ನಾಗಿದೆ. ಆಪ್ತವಾಗುವ ಏಕಾಂತ, ಪೊರೆ ಕಳಚಿಸುವ ಸತ್ಯಗಳು…ವೈಯಕ್ತಿಕ ತಲ್ಲಣದ ಅನುಭವ ನೀಡುವ ಕವಿತೆ.