ಅದೇ ಗಾಳಿ; ಮತ್ತದರ ಪಾಳಿ
ದಿಕ್ಕು ಬದಲಿಸಿ
ಕಚಗುಳಿ ಇಡುವ ಚಾಳಿ

ಅದೇ ನೀರು;
ಮಳೆ ಬಂದಾಗ ಹರಿಯುವುದು  ಜೋರು
ಇಲ್ಲದಿರೆ ಬರದ ಕಾರು-ಬಾರು

ಅದೇ ಬೆಳಕು; ಜ್ಞಾನದ ಸೆಳಕು ಮಡಿ-ಮೈಲಿಗೆಯಿಂದಾಗಿದೆ
ಭಯಂಕರ ಕೊಳಕು

ಅದೇ ಭಾನು;
ಮೋಡಗಳ ಹಾಜರಿ
ಗೈರು ಹಾಜರಿಯ ನಡುವೆ ಕಮಾನು ಕಟ್ಟಿದ ಬಾನು

ಅದೇ ಹಗಲು;
ಸಕಲ ಜೀವ ಸಂಕುಲದ ಹೆಗಲು
ಹೆಜ್ಜೆಯ ಗೆಜ್ಜೆಯ ತುಂಬಾ ದಿಗಿಲು

ಅದೇ ಇರುಳು;
ಒಡಲು ತುಂಬುವ ಕರುಳು
ಕನಸಿನ ಕಿಟಕಿಯಿಂದ ಕಾಣುವ
ನನಸು ಮಾಡುವ ಮನದ
ಮಾತುಗಳ ತಿರುಳು

ಅದೇ ನೆಲ;
ಬಿತ್ತಿದಂತೆ ಬೆಳೆಯುವ ಹೊಲ
ದೇಕರಿಕೆಗೆ ತಕ್ಕಂತೆ ಸಿಕ್ಕುವುದು ಫಲ

ಅದೇ ಗೋಡೆಗೆ ನೇತು ಹಾಕುವ
ಹೊಸ ವರ್ಷದ ಕ್ಯಾಲೆಂಡರ್
ಸಾರಿ ಹೇಳುತ್ತದೆ; ಬದಲಾವಣೆ ಜಗದ ನಿಯಮ

ಇಂತಿರಲು……..
ಕುಡಿದು, ತಿಂದು, ಕೇಕೆ ಹಾಕಿ
ಚರಂಡಿಗೆ ಬಿದ್ದು, ಹೊರಳಾಡಿ ಎದ್ದು
ಮನೆಗೆ ತಲುಪಿದಾಗ ಚಂದ್ರನೂರಿನಲ್ಲಿ ನಕ್ಷತ್ರಗಳ ಚಪ್ಪಾಳೆ ಸದ್ದು  
ಭೂಮಿಗೆ ಮುಟ್ಟಿತ್ತು
ಯಥಾ ಪ್ರಕಾರ ಮುಂಜಾವಿಗೆ
ಕೋಳಿ ಕೂಗಿತ್ತು