ಹಗಲು , ರಾತ್ರಿ ಗಂಟಲು
ಅರಚಿಕೊಂಡ ಧ್ವನಿವರ್ಧಕ ,
ತಣ್ಣಗಾಗಿದ್ದವು.

ತಮ್ಮ ಸರಕಿಗೆ ಬೆಲೆ ಕೂಗಿದ
ಮಾರಾಟಗಾರರು , ಹುರುಪಿನಿಂದ
ಲಾಭ ನಷ್ಟದ ಲೆಕ್ಕದಲ್ಲಿದ್ದರು.

ಮನೆ , ಮನೆಗಳಲ್ಲಿ ತುಂಬಿದ
ನೆಂಟರು , ನಕ್ಕು ನಲಿದು
ಸ್ವ ಊರಿಗೆ ಮುಖ ಮಾಡಿದರು.

ಊರಿನ ಹಾದಿ , ಬೀದಿಯಲಿ
ಕಸದ ರಾಶಿ ಸಣ್ಣಗೆ ಕೊಳೆತು
ಗಬ್ಬು ನಾರಲು ಶುರುವಾಯಿತು .

ದಣಿವರಿಯದೇ ಹುರುಪಿನಿಂದ
ಸಿಂಗರಿಸಿಕೋಂಡು ,  ಅತ್ತಿತ್ತ ಸುಳಿದ
ತರುಣ , ತರುಣೀಯರು ಸುಸ್ತಾಗಿದ್ದರು

ಉತ್ಸವದಲ್ಲಿ ಪಲ್ಲಕ್ಕಿ ಹೊತ್ತವರು
ಪುನೀರಾದೆವೆಂದು ಬೀಗಿದ್ದರು ,
ಮೂರ್ತಿ ಮಾತ್ರಾ ಶಾಂತವಾಗಿತ್ತು.

ಗುಡಿಯಲ್ಲಿರುವ ದೇವರು
ಜಾತ್ರೆಗೆ ಬಂದ ಭಕ್ತರ
ಪಾಪ – ಪುಣ್ಯಗಳ ಲೆಕ್ಕಾಚಾರದಲ್ಲಿದ್ದ.

ಮುಗಿದಿದ್ದ ಜಾತ್ರೆ ಬರೀ ದೇವರದ್ದಲ್ಲ ,
 ಮುಂದೊಂದು ದಿನ,
ನಮ್ಮ ಬದುಕಿನದ್ದೂ ಸಹ .