ಹೀಗೇ ದೂರದಿಂದಲೇ ನೋಡಿ
ಮೂಗು ಮೂತಿ ತಿರುವಿ
ಹೆಣ್ಣೋ ಗಂಡೋ ಎಂದು
 ಪರಕಿಸುವುದೇ ??

ಹುಟ್ಟಿದ ಶಿಶು ಅವನ ಜಾತಿಯದೋ
 ಇವಳ ಜಾತಿಯದೋ
 ತಲೆಕೆಡಿಸಿಕೊಳ್ಳುವುದೇ ಆಯಿತು

ಇದಕ್ಕೆ ನಾಮ ಹಚ್ಚಲಾಗಿದೆ
 ಇದು ಹಿಂದೂನೇ !
ಅಯ್ಯೋ ಸ್ವಲ್ಪ ನೋಡಿ
 ಉಡಿದಾರವಿಲ್ಲದ ಕೂಸು
 ಮುಸ್ಲಿಂ! ಸಂಶಯವೇ ಇಲ್ಲ…|

 ಗುಜು ಗುಜು ಕುಚು ಕುಚು ಮಾತು
ದಗ್ಗನೆ ಬೆಂಕಿ ಹತ್ತಿಕೊಂಡಂತೆ
 ಮಚ್ಚು ಬಡಿಗೆಗಳು ಹಾರಾಡಿದವು
 ಕುಡುಗೋಲು ಮಸೆಯಲ್ಪಟ್ಟವು !

ಅಕ್ಷರದಲ್ಲಿ ಅವಿತ ಶಿಶು
 ಎಲ್ಲರ ಮನ ಮುಟ್ಟಲು
 ಹಂಬಲಿಸುತ್ತಲೇ ಇದೆ
 ನಗುತ್ತದೆ ಎತ್ತಿಕೊಂಡವರ
 ಎದೆಗೆ ಒತ್ತಿಕೊಂಡು |

 ಒಮ್ಮೊಮ್ಮೆ ರಂಪ ತಗೆಯುತ್ತದೆ
 ಭೂಮಿ ಬಾನು ಒಂದಾಗುವಂತೆ !
ದಕ್ಕದ ಬಾನ ನಕ್ಷತ್ರಗಳ
 ಹಿಡಿತಂದು ಉಡಿ ತುಂಬಿಕೊಳ್ಳತ್ತದೆ|

 ದೂರ ಸರಿದವರ ಕಂಡು
 ಗಹಗಹಿಸುತ್ತದೆ
 ನವಜಾತ ಶಿಶುವೀಗ
ವಾಮನನಂತೆ ಎಲ್ಲವನ್ನೂ
 ಆವರಿಸಿಕೊಳ್ಳುತ್ತಿದೆ