ವಯಸ್ಸಾಯಿತಲ್ಲ?
ಎಲ್ಲ ಕೆಲಸಗಳಿಂದೀಗ
ಮುಕ್ತಿಯೆನಗೆ
ನಾನೀಗ ವಿಶ್ರಾಂತ
ಕೆಲಸವಿಲ್ಲ ಅವಸರವಿಲ್ಲ
ನನ್ನ ಮನೆಯೀಗ ಶಾಂತ
ನನ್ನನೇ ನಾನು ಕೇಳುತ್ತಿರುವೆ
ನಾನಾರು?
ವಿಶ್ರಾಂತ…. ನಾನು ನಾನೇ ||

ಒಂದು ಕಾಲವಿತ್ತು, ಕಸುವಿತ್ತು
ಬಂಗಲೆಗಳ ಕಟ್ಟಿದೆ ಜೊತೆಗೆ
ತೋಟದ ಮನೆಯನ್ನೂ…
ಸಣ್ಣದೋ ದೊಡ್ಡದೋ ಬೇಕಿಲ್ಲ
ನಾನೊಬ್ಬ ಆವಿಷ್ಕಾರಿ
ಆದರೀಗ ನಾಲ್ಕು ಸಣ್ಣ ಗೋಡೆಗಳ ನಡುವಿನ ಬಂಧಿ||

ಸರಳವೇನಿರಲಿಲ್ಲ ನನ್ನ ಬದುಕು
ಸೈಕಲ್ಲಿನಿಂದ ಲೂನಾ
ಲೂನಾದಿಂದ ಬೈಕು,
ಬೈಕಿನಿಂದ ಕಾರು
ಎಲ್ಲದರಲ್ಲೂ ನಾನು
ಸ್ಟೈಲ್ ಕಿಂಗೇ
ಈಗ?
ನಾಲ್ಕು ಸಣ್ಣ ಗೋಡೆಗಳ
ಮಧ್ಯೆ ನಿಧಾನ ನಡಿಗೆ||

ನಿಸರ್ಗ ನಗುತ ಕೇಳುತಿದೆ
ಗೆಳೆಯಾ ಹೇಳೀಗ ನೀನಾರು?
ನಾನೂ ನಗುತ್ತಲೇ ಉತ್ತರಿಸುತ್ತೇನೆ
ನಾನು ನಾನೇ……

ನೂರು ನಾಡುಗಳ ಸುತ್ತಿವೆ
ನನ್ನ ಕಾಲುಗಳು
ವಿದೇಶಗಳನ್ನೂ,….
ಕಸುವಿದ್ದ ಕಾಲಕ್ಕೆ
ಖಂಡಾಂತರ ನೆಗೆತಗಳು
ಈಗ?
ನನ್ನ ರೂಮಿನಿಂದ ಅಡುಗೆಮನೆ
ಅದೂ ನಿಧಾನ ನಡಿಗೆ
ಅದೇ ದೂರ||

ನೂರಾರು ಊರುಗಳ
ಕೇರಿಗಳ ಸಂಸ್ಕೃತಿ ಗೊತ್ತೆನಗೆ
ಈಗ?
ನನ್ನದೇ ಕುಟುಂಬದ
ಕರುಳ ಮಿಡಿತ ಅರ್ಥವಾಗಲೊಲ್ಲದು
ನಾನು ಭಾರವಾದೆನಾ? ಕಣ್ಣೀರು||

ಮತ್ತದೇ
ನಿಸರ್ಗ ನಗುತ ಕೇಳುತಿದೆ
ಗೆಳೆಯಾ ಹೇಳೀಗ ನೀನಾರು?
ನಾನೂ ನಗುತ್ತಲೇ ಉತ್ತರಿಸುತ್ತೇನೆ
ನಾನು ನಾನೇ……||

ಒಂದು ಕಾಲವಿತ್ತು
ಮಕ್ಕಳ ಹುಟ್ಟಿದಬ್ಬವೋ
ನಿಶ್ಚಿತಾರ್ಥವೋ, ಮದುವೆಯೋ…..
ಅದ್ಧೂರಿಗೆ ಇನ್ನೊಂದು
ಹೆಸರೇ ನಾನಾಗಿರುತ್ತಿದ್ದೆ
ಈಗ?
ತರಕಾರಿ ತರಲು
ಚಿಲ್ಲರೆಗಾಗಿ ತಡಕಾಡುತ್ತಿರುವೆ||

ಆ ಕಾಲಕ್ಕೆ ನನ್ನೆಡಬಲಕ್ಕೆ
ನಾಯಿಗಳು
ಕೊಟ್ಟಿಗೆಯ ತುಂಬ ಹಸುಗಳು
ನಾನೇ ತಿನ್ನಿಸಬೇಕಿತ್ತವಕ್ಕೆ
ಈಗ?
ನನಗೇ….ಎರಡು ತುತ್ತು ಬೇಕು
ಮೂರನೇದು ಸಾಕು||

ಮತ್ತದೇ
ನಿಸರ್ಗ ನಗುತ ಕೇಳುತಿದೆ
ಗೆಳೆಯಾ ಹೇಳೀಗ ನೀನಾರು?
ನಾನೂ ನಗುತ್ತಲೇ ಉತ್ತರಿಸುತ್ತೇನೆ
ನಾನು ನಾನೇ…..||

ನಾ ಗಳಿಸಿದ ಬೆಳ್ಳಿ-ಬಂಗಾರ
ಮುತ್ತು-ರತ್ನ, ವಜ್ರ-ವೈಢೂರ್ಯ ಗಳು
ಮುದುಡಿ ಮಲಗಿವೆ ಲಾಕರಿನಲ್ಲಿ
ಚೆಂದದ ಶ್ಯೂಟು ಬೂಟು ಜಾಕೆಟ್ಟು
ವಾರ್ಡರೋಬಿನಲ್ಲಿ
ಈಗ?
ಮೃದು ಬಿಳಿ ಪೈಜಾಮ
ಮೇಲೊಂದು ಬಿಳಿಯದೆ ಅರ್ಧಂಗಿ… ||

ಒಂದು ಕಾಲವಿತ್ತು
ಇಂಗ್ಲೀಷು, ಹಿಂದಿ
ಫ್ರೆಂಚು ಸ್ಪ್ಯಾನಿಶ್ಶು….
ನಾ ಬಹು ಭಾಷಾ ಪಂಡಿತ
ಈಗ?
ತಾಯಿ ಯಿಲ್ಲದ ನನಗೆ
ತಾಯಿ ಭಾಷೆ ಮಾತ್ರ ಗತಿ||

ಒಂದೊಮ್ಮೆ ನಾ
ಕಟು ನಿಯಮ ಪಾಲಕ
ಕಲಿತ ಶಿಕ್ಷಣದ ಅನುಪಾಲಕ
ಈಗ?
ಗೊತ್ತಾಗುತ್ತಿದೆ ಸತ್ಯವೇನೆಂದು||

ಸಾಕು ಸಾಕೀಗ
ಬದುಕ ಪಯಣಿಗನೇ
ಸಿದ್ಧನಾಗು
ಅಂತಿಮ ನಮನಕ್ಕೆ
ಕಾಯುತ್ತಿದೆ ಜಗ
ನಗುತ ತಯಾರಾಗು||

ಮತ್ತದೇ
ನಿಸರ್ಗ ನಗುತ ಕೇಳುತಿದೆ
ಗೆಳೆಯ ಹೇಳೀಗ ನೀನಾರು?
ಆದರೀಬಾರಿ ನಾನಂದೆ

ನಿಸರ್ಗವೇ