ಕಾವ್ಯ ಸಂಗಾತಿ
ಎಮ್ಮಾರ್ಕೆ
ʼಮಧ್ಯದ ಸದ್ಯದ ಪದ್ಯʼ
ಕೇಳಿದರೂ ಕಿವುಡರಂತಿರುವ
ಈ ಜಗದ ಜನರ ಮಧ್ಯ,
ಯಾರ ಕಿವಿಗೂ ಕೇಳದಂತೆ
ಪಿಸುಗುಡಬೇಕಿದೆ ಸದ್ಯ
ಕಂಡರೂನು ಕಾಣದಂತಿರುವ
ಈ ಜಗದ ಜನರ ಮಧ್ಯ,
ಯಾರ ಕಣ್ಣಿಗೂ ಬೀಳದಂತೆ
ಸುಳಿದಾಡಬೇಕಿದೆ ಸದ್ಯ
ಘ್ರಾಣಿಸಿ ಗ್ರಹಿಸದಂತಿರುವ
ಈ ಜಗದ ಜನರ ಮಧ್ಯ,
ಯಾರ ನಾಸಿಕಕೂ ಸಿಗದಂತೆ
ಸುಮ್ಮನಿರಬೇಕು ಸದ್ಯ
ಅರಿತರೂ ಅರಿಯದಂತಿರುವ
ಈ ಜಗದ ಜನರ ಮಧ್ಯ,
ಯಾರ ಅರಿವಿಗೂ ಬಾರದಂತೆ
ದೂರವಾಗಿರಬೇಕು ಸದ್ಯ
ಜಗದ ಜಂಜಡದ ಮಧ್ಯ ಸಿಕ್ಕಿ
ಬರೆದಿರುವೆ ಈ ಸಾಲು ಸದ್ಯ,
ಕಣ್ಣು ಕಾಣದೇ ತುಟಿಯೊದದೇ
ಅನಾಥವಾಗದಿರಲಿ ಈ ಪದ್ಯ
ಎಮ್ಮಾರ್ಕೆ
About The Author
