ಕಾವ್ಯ ಸಂಗಾತಿ
ಈಶ್ವರ ಜಿ ಸಂಪಗಾವಿ
ಗಜಲ್
ನನ್ನೆದೆಯ ರಾಜ್ಯವಾಳು ಬಾ ಬೇಗ ಜೀವದ ತಳಮಳವ ತಾಳಲಾರೆ ಗುರುವೆ
ಮನ್ನಣೆಯ ಕೊಡದ ಆವೇಗ ಅವಸರದ ಬದುಕಿನಲಿ ಬಾಳಲಾರೆ ಗುರುವೆ
ದಹಿಸುವ ಹೃದಯಕೆ ತಂಪನೆರೆವ ಮಳೆಗರೆದು ಸಂಕಟವ ದೂರಿಡು ದೇವ
ಸಹಿಸದ ಚಡಪಡಿಕೆಗೆ ಹಾಕಿರುವ ಬೀಗನ್ನು ಮುರಿದು ಏಳಲಾರೆ ಗುರುವೆ
ಸುಡುನೋಟದ ಬಾಣಕೆ ಚಿತ್ತ ಪಲ್ಲಟವಾಗಿ ದಿಕ್ಕು ಕಾಣದಾಗಿದೆ ಸತತ
ಮಾತು ಮೌನವಾಗಿ ಹುಚ್ಚು ಗುರಿಯಿರದ ದಾರಿಯನ್ನು ಸೀಳಲಾರೆ ಗುರುವೆ
ಕನಸುಗಳ ಹೊಂಬಣ್ಣ ಮನದಲ್ಲಿ ಮೂಡುತ್ತ ಗಾಳಿಗೋಪುರ ಕಟ್ಟುತಿವೆ
ಬಾಳಿನಲಿ ಗುರಿ ತಪ್ಪಿದ ಪ್ರಯೋಗ ಮಣ್ಣಾಗುವುದ ಕೇಳಲಾರೆ ಗುರುವೆ
ಕಟ್ಟು ಪ್ರೇಮ ಸಾಮ್ರಾಜ್ಯ ಕನವರಿಸಿ ನನಸಾಗಲಿ ಮನದ ಮಹತ್ವಾಕಾಂಕ್ಷೆಗಳು
ಈಶನ ವರ ಪಡೆದ ಸಂಜೋಗ ಅರಸುತ್ತ ಬಯಕೆಯ ಹೂಳಲಾರೆ ಗುರುವೆ
About The Author
