ಸುಜಾತಾ ರವೀಶ್-ಗಜಲ್

ಕಾವ್ಯ ಸಂಗಾತಿ

ಗಜಲ್

ಸುಜಾತಾ ರವೀಶ್

ಮನೆಯಂಗಳದಿ ಚೆಲುವ ವಿಸ್ತಾರವಾಗಿ ಹೊಳೆದಿಹುದು ಈ ರಂಗೋಲಿ
ಮನದಂಗಣದಿ ಒಲವ ಪ್ರಸ್ತಾರವಾಗಿ ಉಳಿದಿಹುದು ಈ ರಂಗೋಲಿ

ಅಂಗನೆಯರ ಸೃಜನತೆಗೆ ನಿದರ್ಶನವಾಗಿ
ನಿಂತಿದೆ ಪುರಾಣ ಕಾಲದಿಂದ
ರಂಗನೊಲಿಸುವ ಪರಿಯೆಂದು ವರ್ಣಿತವಾಗಿ ಬೆಳೆದಿಹುದು ಈ ರಂಗೋಲಿ

ಬಳ್ಳಿ ಎಲೆ ಹೂವುಗಳು ಎಳೆಎಳೆಯಾಗಿ ಮೂಡಿ ನಗುತಿಲ್ಲವೇ
ಬೆಳ್ಳನೆಯ ಬೆಳಗಿನಲಿ ಶ್ವೇತ ಚಿತ್ತಾರವಾಗಿ
ಬೆಳಗಿಹುದು ಈ ರಂಗೋಲಿ

ರಂಗಿನ ಬಗೆಬಗೆ ಪುಡಿಗಳು ಮೈದುಂಬಿ ಕಣ್ಣ ತಣಿಸಿರುವುವು ನೋಡು
ದಂಗುಗೊಳಿಸುತ ಹೂವಿಂದ ಅಲಂಕೃತವಾಗಿ ಸುಳಿದಿಹುದು ಈ ರಂಗೋಲಿ

ಹವ್ಯಾಸವಿದನು ರೂಢಿಸುತ ಬಳಸುತಿಹಳು ಸುಜಿ ಎಳವೆಯಿಂದ
ವಿನ್ಯಾಸಗಳ ರಚನೆಗೆ ಮನವ ಹರ್ಷಿತವಾಗಿ ತೊಳಗಿಸಿಹುದು ಈ ರಂಗೋಲಿ

About The Author

admin

See author's posts