ಡಾ ಅನ್ನಪೂರ್ಣ ಹಿರೇಮಠ ಕವಿತೆ ನೀ ಬಂದು

ಕಾವ್ಯ ಸಂಗಾತಿ

ಡಾ ಅನ್ನಪೂರ್ಣ ಹಿರೇಮಠ ಕವಿತೆ

ನೀ ಬಂದು

ನಾ ಸೀರೆ ಉಡುವಾಗ ಬಂದು
ನೀರಿಗೆಗಳ ಕೆಡಿಸಿ
ಸಿಟ್ಟು ಬರುವಂತೆ ಮಾಡಿ
ಗಲ್ಲ ನೇವರಿಸಿ
ಮೆಲ್ಲಗೆ ರಮಿಸಿ
ಅರಿಯದಂತೆ ನನ್ನ ಬಳಸಿ
ಮುತ್ತು ಕೊಡುವೆ ಎಂದುಕೊಂಡಿದ್ದೆ//

ನಾ ಹನಿ ಬೋಟ್ಟು ಇಡುವಾಗ ಬಂದು
ಕಣ್ಹೊಳೆದು ಕೆಣಕಿ
ಕಣ್ಣಲ್ಲಿ ಕಣ್ಣಿಟ್ಟು
ಮೋಡಿ ಮಾಡಿ
ಪ್ರೀತಿ ಬಾಣವ ಹೂಡಿ
ಎದೆಯಲಿ ಪವಡಿಸಿ ಮೈಮರೆಸುವೆ
ಎಂದುಕೊಂಡಿದ್ದೆ//

ಕೈ ಬಳೆ ತೊಡುವಾಗ ಬಂದು
ಮೆಲ್ಲ ಕೈ ಹಿಡಿದು
ಸ್ಪರ್ಶ ಸುಖದ ಹರ್ಷದೆ
ಉನ್ಮಾದ ಉಕ್ಕಿಸಿ
ದೇಹ ಕಂಪಿಸುವಾಗ
ಅಪ್ಪಿ ಮುದ್ದಾಡಿ ಜಗ ಮರೆಸುವೆ
ಎಂದುಕೊಂಡಿದ್ದೆ//

ಆಭರಣ ಇಡುವಾಗ ಬಂದು
ಕೋಮಲ ಕೊರಳ ಸುತ್ತೆಲ್ಲ
ನಿನ್ನರಾಯ ಭಾರ
ಸಿಹಿ ಮುತ್ತುಗಳ ಮಣಿಹಾರ
ತೊಡಿಸಿ ಸಿಂಗರಿಸಿ
ಸ್ವರ್ಗ ಸುಖದಿ ವಿಹರಿಸುತ
ನೀಗಿ ಎದೆಯ ಭಾರ
ಹೃದಯ ಹಗುರಾಗಿಸುವೆ ಎಂದುಕೊಂಡಿದ್ದೆ//

ಬರುವೆನೆಂದು ಭರವಸೆ
ಕೊಟ್ಟವನೂ ನೀನೆ
ತಾಳು ಎಂದವನೂ ನೀನೆ
ಕಾದು ಕಾದು ಕಂಗೆಟ್ಟು
ವಿರಹದಲಿ ಬೆಂದು ಬೆಂದು
ಬಸವಳಿದು ಬೆಂಗಾಡಲಿ
ಅಲೆಯುವಂತೆ ಮಾಡಿ
ಎಲ್ಲಿರುವೆ ನೀ ಹೇಗಿರುವೆ ಮರೆಯಾಗಿ//

ಡಾ ಅನ್ನಪೂರ್ಣ ಹಿರೇಮಠ